Oxford Economics tarapyndan taýýarlanan Global Cities Index 2026 reýtinginde Nýu-Ýork birinji orny eýeledi. Ikinji orunda London, üçünji orunda bolsa Pariž ýerleşdi.
Reýting 1000 şähere bäş ölçeg boýunça baha berýär: ykdysadyýet, adam kapitaly, durmuş hili, daşky gurşaw we dolandyryş netijeliligi. Ilkinji ýüzlükde Ýewropanyň 44 şäheri, ABŞ-nyň 30 şäheri we Kanadanyň dört şäheri bar.
Iň gowy şäherleriň ilkinji onlugy şeýle görnüşde:
- Nýu-Ýork — 100 bal;
- London — 98,8 bal;
- Pariž — 93,4 bal;
- Sietl — 92,8 bal;
- San-Fransisko — 91,9 bal;
- Dublin — 91,3 bal;
- Boston — 90,7 bal;
- San-Hose — 89,6 bal;
- Tokio — 89,5 bal;
- Sýurih — 89,1 bal.
Ýewropa şäherleri ýaşaýşyň hili, ekologik netijelilik we dolandyryş durnuklylygy üçin oňyn bahalara eýe boldy. Amerikan şäherleri ykdysadyýetiň we adam kapitalynyň görkezijileri boýunça ýokary orunlaryny saklap galdy. Nýu-Ýork ykdysady kuwwaty üçin iň ýokary baha eýe boldy, Sietl, San-Fransisko we San-Hose bolsa öňdebaryjy tehnologik merkezler hökmünde tapawutlandy.
London öz uniwersitetleri, işewürlik gurşawy we ýokary derejeli hünärmenleri çekmek ukyby bilen adam kapitaly boýunça dünýäde iň ýokary görkezijä eýe boldy. Şol bir wagtyň özünde ol ýaşaýşyň hili boýunça gowşak netije görkezdi — 77 bal.
Uly şäherleriň umumy meseleleriniň biri ýaşaýyş jaýlarynyň elýeterliligi bolup galýar. London, Dublin we Nýu-Ýork gozgalmaýan emlägiň ýokary bahasy sebäpli ballaryny ýitirýär.
Ýewropa şäherleriniň arasynda iň uly ösüşi Warşawa görkezdi, ol 109 basgançak ýokary galyp, 61-nji orny eýeledi. Şeýle hem Stambul (+42 basgançak), Madrid (+14), Budapeşt (+14), Helsinki (+12), Brýussel (+9), Berlin (+7), Lion (+7), Sýurih (+6), Oslo (+6) we Amsterdam (+6) öz orunlaryny ep-esli gowulandyrdy.
Iň uly pese gaçyşy Lissabon görkezdi — ol 44 basgançak aşak düşüp, 148-nji orny eýeledi. Rim sekiz basgançak ýitirip, 119-njy boldy.
