13 ýaşly hytaýly suwda ýüzüji Ýu Szydi Aziýa oýunlarynda 200 metr aralyga toplumlaýyn ýüzmekde ýeňiş gazandy. Türgen 2 minut 06,10 sekunt netijäni görkezip Aziýanyň täze rekordyny goýdy.
Ýaponiýada dowam edýän Aziýa oýunlarynda Ýu Szydi öz watandaşy Ýuý Iting tarapyndan goýlan rekordy (2:06.82) täzeledi. Türgeniň 20 ýaşly kanadaly Sammer Makintoşyň goýan dünýä rekordyny (2:05.70) täzelemegine bary-ýogy 0,40 sekunt ýetmedi.
Ýaryşdaky ilkinji altyn medalyny hytaýly gyz bir gün öň 200 metr aralyga batterflýaý usulynda ýüzmekde gazanypdy. Şonda ol bu ugurda Aziýa oýunlarynyň rekordyny (2:05.08) täzeläpdi.
«Ikinji altyn medalyma birinjidenem beter begendim» diýip, BBC Ýu Szydiniň sözlerini getirýär.
Ýu Szydi geçen ýyl 12 ýaşynda dünýä çempionatynyň medalyny gazanan iň ýaş suwda ýüzüji bolupdy. Şonda ol Hytaýyň milli ýygyndysynyň düzüminde 4×200 metr aralyga erkin usulda estafeta ýaryşynda bürünç medala mynasyp boldy.
Aziýa oýunlary Ýaponiýanyň Nagoýa şäherinde geçirilýär we 4-nji oktýabrda tamamlanar.
