Halkara küşt federasiýasynyň (FIDE) Baş assambleýasy nusgawy küştde wagt gözegçiligini gysgaltmak baradaky kararnamany goldady. Bu barada guramanyň saýtynda habar berilýär.
Resminama laýyklykda, ýaryşlarda ýörite tassyklama bolmazdan, 60 minut we her göçüme 30 sekunt (60+30) wagt gözegçiligi bilen, aýratyn ýagdaýlarda bolsa 45+30 wagt gözegçiligi bilen döwleri geçirmäge rugsat berler. Indi FIDE-niň geňeşine bu üýtgeşmeleri maslahatlaşyp, tassyklaýmak galdy.
Mundan öň ýokary derejeli nusgawy ýaryşlar üçin iň az wagt gözegçiligi her döw üçin 90 minut we her göçüme 30 sekuntdy (90+30). Şol bir wagtyň özünde, bu wagt gözegçiligi esasy standart bolmagynda galar.
Mundan başga-da, titul we dereje berilýän ýaryşlar üçin çäklendirmeler saklanýar: küştçüler bir günde ikiden köp döw oýnap bilmeýär we at almak üçin zerur bolan normalardan gysgaldylan wagt gözegçiliginde ýerine ýetirilen diňe bir küşt normasyny hasaba almaga rugsat berilýär. Reýtinge täsir edýän bäsleşikler üçin bir günde 12 sagatdan köp bolmadyk oýun çäklendirmesi hereket edýär, onuň çäginde ikiden köp döw oýnalyp bilner.
