Türkmenistanyň ýygyndy topary 10 – 19-njy iýulda Özbegistanyň paýtagty Daşkent şäherinde geçirilen 58-nji Halkara himiýa olimpiadasynda üstünlikli çykyş etdi.
Dünýäniň 92 döwletinden 363 gatnaşyjyny bir ýere jemlän bu abraýly akyl-paýhas bäsleşiginde ýurda Aşgabat şäheriniň Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň okuwçylary wekilçilik etdi.
Bäsleşigiň jemleri boýunça türkmen mekdep okuwçylary bir kümüş we üç bürünç medal gazandy. Olimpiadanyň netijelerine görä, kümüş medala 11-nji synp okuwçysy Pälwan Ilmämedow mynasyp boldy, bürünç medallary bolsa 12-nji synp okuwçylary Diýar Döwletow, Aýlar Orunowa we Rüstem Jumaýew aldy.
Ýaş himikleriň halkara derejede gazanan bu üstünligi ýurtda zehinli ýaşlary taýýarlamagyň ýokary derejesiniň we bilim ulgamynyň netijeliliginiň aýdyň subutnamasy boldy.
