Kongo Demokratik Respublikasynda (KDR) aprel aýyndan bäri ýaýraýan Ebola wirusy sebäpli dörän kesel epidemiýasy gözegçilikleriň tutuş taryhynda kesellän adamlaryň sany boýunça ikinji epidemiýa boldy. Bu barada «Reuters» agentligi ýazýar.
KDR-iň häkimiýetleriniň 31-nji iýuldaky maglumatlaryna görä, ýurtda 3 532 sany keselleme ýagdaýy hasaba alyndy, pida bolanlaryň sany bolsa 1 556 adama ýetdi.
Deňeşdirmek üçin, 2018–2020-nji ýyllardaky epidemiýa wagtynda 3 481 adam keselläp, 2 270 adam heläk bolupdy. Diňe 2014–2016-njy ýyllarda Günbatar Afrikadaky (Gwineýa, Liberiýa we Sýerra-Leone) epidemiýa öňdeligi saklaýar, şonda BSGG 28 616 kesellän adamy we 11 310 ölümi hasaba alypdy.
«The New York Times» we Associated Press häzirki epidemiýanyň öňküden ep-esli çalt ýaýraýandygyny nygtaýar. 2018–2020-nji ýyllarda 1,5 müň ölen adam görkezijisine 10 aýda ýetilen bolsa, häzir bu çäkden bary-ýogy üç aýyň içinde geçildi.
KDR-de ýokanç keseliň ýaýramagy ony saklamak boýunça edilýän tagallalardan öňe geçýär. Häzirki kesel ýaýrawynyň esasy oýaryjysy hökmünde Bundibujio wirusy çykyş edýär.
Şol bir wagtyň özünde goňşy Ugandada 28-nji iýulda epidemiýanyň tamamlanandygy yglan edildi: ol ýerde dört hepdäniň dowamynda täze ýagdaýlar ýüze çykarylmady. Ugandada umumylykda 20 sany keselleme we üç sany ölüm ýagdaýy hasaba alyndy.
