2025-nji ýylyň netijelerine görä, Merkezi Aziýa dünýäde syýahatçylyk pudagy iň çalt ösýän sebit hökmünde ykrar edildi.
Bütindünýä syýahat we syýahatçylyk geňeşiniň (WTTC) hasabatyna görä, pudagyň sebitiň jemi içerki önümine (JIÖ) goşan goşandy bir ýylda 17,7% artdy — bu ähli sebitleriň arasynda iň ýokary görkezijidir.
Geçen ýyl syýahatçylyk Merkezi Aziýanyň ykdysadyýetine 20,1 milliard dollar ýa-da sebit JIÖ-siniň 4,3%-ini üpjün etdi. WTTC-niň çaklamasyna görä, 2026-njy ýylda bu görkeziji 21,7 milliard dollara ýeter.
2019-njy ýyl bilen deňeşdirilende, syýahatçylygyň ykdysadyýete goşandy 27,1% artdy. Syýahatçylyk çykdajylarynyň umumy möçberi 15,4 milliard dollara ýetdi, munuň 9,9 milliardy daşary ýurtly syýahatçylaryň, 5,5 milliardy bolsa içerki syýahatçylygyň paýyna düşdi. Çykdajylaryň agramly bölegi dynç alyş we göwün açyş bilen baglydyr.
2025-nji ýylda sebitiň syýahatçylyk pudagynda 1,7 million adam zähmet çekdi — bu hasap öňki ýyldan 9,5% köp diýmekdir. Çaklamalara görä, 2036-njy ýyla çenli bu görkeziji 2,2 million iş ornuna ýetmeli.
Mundan ötri, syýahatçylyk infrastrukturasyna gönükdirilýän maýa goýumlary 12,4% artdy, bu bolsa Merkezi Aziýa pudaga maýa goýumlarynyň ösüş depgini boýunça dünýäniň iň öňdebaryjy üçlügine girmäge mümkinçilik berdi.
2025-nji ýylda Merkezi Aziýa ýurtlaryna gelen syýahatçylaryň akymyny şu ýurtlar üpjün etdi:
- Gazagystan — 29%;
- Özbegistan — 22%;
- Russiýa — 20%;
- Gyrgyzystan — 19%;
- Hytaý — 2%;
- dünýäniň galan bölegi — 8%.
WTTC-niň bu statistikasyndan çen tutsaň, syýahatçylaryň köpüsi goňşy ýurtlardan gelýär. Şol bir wagtyň özünde Özbegistan medeni-bilim syýahatçylygynda öňdebaryjy orny saklaýar, Gazagystan bilen Gyrgyzystan bolsa syýahatçylyk infrastrukturasyny işjeň ösdürýär.
