Türkmenistanyň Prezidenti Serdar Berdimuhamedow Singapur Respublikasynyň Prezidenti Tarman Şanmugaratnama, premýer-ministri Lourens Wonga we ýurduň ähli halkyna Singapur Respublikasynyň Milli güni mynasybetli tüýs ýürekden gutlaglaryny hem-de iň gowy arzuwlaryny ýollady. Bu barada resmi türkmen metbugatynda habar berilýär.
Singapuryň Milli güni 9-njy awgustda bellenilýär. 1965-nji ýylyň hut şol güni ýurt Malaýziýanyň düzüminden çykyp, doly özbaşdak döwlet hökmünde yglan edilipdi.
Türkmenistanyň döwlet Baştutany öz gutlagynda Singapur Respublikasynyň Prezidentine we premýer-ministrine tüýs ýürekden berk jan saglyk, bagtyýarlyk, abadançylyk, ýurduň halkyna bolsa parahatçylyk, mundan beýläk-de ösüş we rowaçlyk arzuw etdi.
Ýurtda dabaraly ýagdaýda bellenilýän bu baýramçylygyň esasy wakasy Singapuryň milli ýörişiniň («National Day Parade») geçirilmegidir.
