«Barselona» indi resmi ýagdaýda tomsuň iň uly transfer kampaniýalarynyň birini geçirdi. Klub Ispaniýanyň ýygyndysynyň we «Mançester Sitiniň» ýarymgoragçysy Rodriniň geçendigi barada yglan etdi.
2024-nji ýylyň «Altyn topunyň» eýesi we 2026-njy ýylyň dünýä çempiony bolan 30 ýaşly futbolçy «Barselona» bilen 2030-njy ýylyň 30-njy iýunyna çenli şertnama baglaşdy. Katalonlar ýarymgoragçy üçin 60 million ýewro tölegi göni geçirdiler, bonus görnüşinde bolsa ýene 16,5 million ýewro tölemäge kaýyl boldular.
Öň insaýderler futbolçynyň karýerasyny Madridiň «Realynda» dowam etdirip biljekdigini habar beripdi, ýöni oýunçynyň özi «blaugranany» saýlady.
«Bu ýerde bolmagyma örän begenýändigimi aýdasym gelýär. Bu üýtgeşik gün, karýeramdaky täze möhüm bap. Bu agyr çözgüt boldy. Men özüme hemme zady beren «Siti» toparyny terk etdim, olara elmydama minnetdar bolaryn. Meniň geçmegimi ýeňilleşdirendigiňiz üçin, oglanlar, size sagbolsun aýdýaryn.
«Barselona» özüniň futbol düşünjesi we klubuň gymmatlyklary bilen meniň üçin hemişe dünýä derejesindäki nusga bolupdy. Dogrusy, maňa ýene bir teklip gelipdi, ýöne «Barsa» — ilkinji saýlanym. Ýolbaşçylara hem şeý diýdim» – diýip, Rodri «Barselonanyň» futbolçysy hökmünde geçirilen tanyşdyrylyşda gürrüň berdi.
Ispaniýaly futbolçydan başga-da, ýakyn wagtda «Barselonanyň» hataryna Portugaliýanyň ýygyndysynyň goragçysy Žoau Kanselu hem ymykly goşular. 32 ýaşly futbolçy Saud Arabystanynyň «Al-Hilýal» topary bilen şertnamany ýatyrmak barada ylalaşdy we erkin agent hökmünde «Barselona» geçer. Öň ol katalonlaryň düzüminde kärendesine oýnapdy.
Mundan başga-da, klubuň ulgamyna rowaýaty futbolçysy Serhio Buskets gaýdyp geldi, ýöne täze rolda. Ol Ispaniýanyň dördünji diwizionynda çykyş edýän ätiýaçlykdaky toparyň — «Barsa Atletigiň» (Barselona B) baş tälimçisiniň kömekçisi wezipesine bellenildi. Buskets tälimçilik ygtyýarnamasyny almak üçin katalonlaryň öňki oýunçysy Žuliano Bellettiniň ştabyna goşulýar.
«Barselona» diňe bir satyn alman, satýaram. Dünýä çempionatynyň finalynda Argentinanyň derwezesine Ispaniýanyň ýygyndysynyň ýeňiş topuny geçiren Ferran Torresiň «PSŽ» toparyna transferi ahyrsoňy resmi taýdan tassyklandy.
Pariž kluby 26 ýaşly hüjümçiniň geçendigini we onuň bilen 2031-nji ýylyň iýunyna çenli şertnama baglaşylandygyny yglan etdi. Transfermarkt-yň maglumatlaryna görä, şertnama mukdary 50 million ýewro deň boldy.
Geçen möwsümde Torres Ispaniýanyň çempionatynda we Çempionlar ligasynda 43 duşuşykda 19 gol geçirdi we üç assist etdi, DÇ-2026-da bolsa sekiz oýunda 1+1 utuk toplady.
Torresden başga-da, «Aýaksyň» 21 ýaşly wingeri Mika Godts hem «PSŽ-niň» täze oýunçysy boldy (şertnama 2031-nji ýylyň iýunyna çenli). Insaýder Fabrisio Romano belgiýalynyň transferiniň 55 million ýewro boljakdygyny habar berdi, RMC Sport-yň žurnalisti Fabris Hokins bolsa has takyk sanlary aýdýar: 45 million ýewro + 10 million ýewro bonus.
Göze ilýän beýleki habarlar we insaýdlar
- Jed Spens («Inter»): Milan kluby «Tottenhemden» Angliýanyň ýygyndysynyň 26 ýaşly futbolçysyny satyn aldy. Transfermarkt-yň maglumatlaryna görä, şertnamanyň mukdary 30 million ýewro boldy, 2031-nji ýyla çenli ylalaşyk gazanyldy.
- Gulýelmo Wikario («Ýuwentus»): «Tottenhemiň» derwezebany 2027-nji ýylyň tomsuna çenli kärendesine Turin klubuna geçdi, şunda 8 million ýewro + 2 million bonus töläp satyn almak mümkinçiligi hem bar.
- Jon Lukumi («Ýuwentus»): Turinliler «Bolonýanyň» 28 ýaşly kolumbiýaly goragçysyny 20 million ýewro we bonus bilen özlerine aldy. Şertnama 2027-nji ýylyň tomsuna çenli niýetlenýär.
- Duşan Wlahowiç («Beşiktaş»): Türk kluby 26 ýaşly serbiýaly hüjümçi bilen 2028/2029 möwsüminiň ahyryna çenli ýylda 7,5 million ýewro zähmet haky bilen şertnama baglaşylandygy barada habar berdi. Wlahowiç «Ýuwentusdan» gidenden soň Stambully topara erkin agent derejesinde goşuldy.
- Amar Dediç («Nýukasl»): «Nýukasl» Bosniýa we Gersegowinanyň ýygyndysynyň goragçysyny «Benfikadan» 35 million ýewro satyn aldy. Oýunçy bäşýyllyk şertnama baglaşdy.
- Diegu Moreýra («Milan»): Fabrisio Romanonyň maglumatlaryna görä, 22 ýaşly winger «Strasburgdan» «Milana» 50 million ýewro we bonuslar hem-de geljekki satuwdan göterim bilen geçýär.
- Rodrigu Mora («Roma»): Fabrisio Romano ýarymgoragçynyň «Portudan» «Roma» 25 million ýewro we geljekki satuwdan 50% bilen (galan 50% hukuklary satyn almak hukugy bilen) geçendigi barada habar berdi.
- L'Équipe: «Liwerpul» parižlileriň talap edýän 169 million ýewro bahasyny aşa ýokary hasaplap, «PSŽ» bilen winger Bredli Barkola baradaky gepleşikleri wagtlaýyn goýbolsun etmek kararyna geldi.
- Fabrisio Romano: «Çelsi» Enso Fernandesiň ykbaly boýunça gepleşikler üçin anna güni agşama çenli möhlet goýdy we 140,5 million ýewro teklibe garaşýar. Ýarymgoragça «Mançester Siti» dalaş edýär.
