Türkmenistanyň «Ahal» futbol klubunyň 2026/2027 möwsüminde AFK-nyň Çagyryş ligasynyň toparçalaýyn tapgyryndaky garşydaşlary belli boldy. Klub Liwanyň «Al-Ansar», Siriýanyň «Al-Ittihad» we Butanyň «Paro» toparlary bilen oýnar.
Ýaryşyň bije çekilişigi Kuala-Lumpurdaky (Malaýziýa) Aziýa futbol konfederasiýasynyň öýünde geçirildi.
Türkmenistanyň Ýokary ligasynyň geçen möwsüminde «Ahal» ikinji orny eýeledi we Çagyryş ligasynda Günbatar zolagyň «A» toparçasyna düşdi.
Toparçalaryň duşuşyklary 17–23-nji oktýabr aralygynda Butanda merkezleşdirilen görnüşde geçiriler. Her bir topar garşydaşlaryň her biri bilen bir oýun oýnar.
Bije çekilişikden öň türkmen kluby Kuweýtiň «Al-Arabi» we Hindistanyň «Goa» toparlary bilen bilelikde birinji sebetde ýerleşdi, şol sebäpli toparçalaýyn tapgyrda bu toparlar bilen duşuşyp bilmedi.
Häzirki möwsümde AFK-nyň Çagyryş ligasynda Günbatar we Gündogar zolaklaryň arasynda paýlanan 20 klub çykyş eder. Toparçalaýyn tapgyryň her bir gatnaşyjysy 100 müň dollar kepillendirilen pul baýragyny alar. Yklymyň ähmiýeti boýunça üçünji klub ýaryşy Aziýanyň ösüp gelýän futbol ligalarynyň klublaryny goldamaga we ösdürmäge gönükdirilendir.
Çärýek finala sekiz topar çykar. Günbatar zolakdan toparçalaryň üç ýeňijisi we ikinji orny eýelänleriň arasynda iň gowy topar, Gündogar zolakdan bolsa her toparçadan iň gowy iki topar çykar.
Çärýek final duşuşyklary 2027-nji ýylyň martynda, ýarym finallar aprelde geçiriler. Final bolsa 8-nji maýa meýilleşdirilýär.
