Türkmenistanyň Prezidenti wise-premýer Serdar Berdimuhamedowy Ýokary gözegçilik edarasynyň başlygy wezipesinden boşatdy we ony Döwlet howpsuzlyk geňeşiniň düzüminden çykaryp, Ministrler Kabinetiniň Başlygynyň maliýe we ykdysadyýet ulgamyna gözegçilik edýän orunbasary wezipesine belledi. Şeýle hem ol Garaşsyz Döwletleriň Arkalaşygyna agza ýurtlaryň Ykdysady geňeşine Türkmenistandan wekil hökmünde bellenildi.
S.Berdimuhamedowyň ozal eýelän Ministrler Kabinetiniň Başlygynyň şol bir wagtda Ýokary gözegçilik edarasynyň başlygy hem-de Döwlet howpsuzlyk geňeşiniň agzasy bolup durýan orunbasarynyň wezipesi ýapyldy. Ministrler Kabinetiniň Başlygynyň ykdysady, bank we halkara maliýe guramalary meseleleri boýunça orunbasary Adalat ministrligi bilen bilelikde degişli karardan gelip çykýan üýtgetmeleri we goşmaçalary Türkmenistanyň kanunçylygyna girizmek baradaky teklipleriň bir aý möhletde taýýarlanylmagyny we Ministrler Kabinetine berilmegini üpjün etmäge borçly edildi.
Türkmenistanyň Ýokary gözegçilik edarasynyň başlygy wezipesine Döwlet Täşliýew bellenilip, ol şol edaranyň başlygynyň orunbasary wezipesinden boşadyldy.
Bu barada 9-njy iýulda geçirilen Türkmenistanyň Ministrler Kabinetiniň giňişleýin mejlisinde habar berildi.
