ABŞ-nyň iň iri bäş sany tehnologiýa kompaniýasy — Alphabet, Microsoft, Amazon, Meta we Oracle emeli aň infrastrukturasyna gönükdirilen iri maýa goýumlarynyň täsirinde takmynan 1,65 trillion dollar möçberinde bergi toplady. Bu barada Nikkei Asian Review neşiri ýazýar.
Çeşmäniň maglumatlaryna görä, bu borçlaryň takmynan 1,35 trillion dollary maliýe hasabatynda resmi taýdan görkezilen, galan bölegi bolsa hasabatdan daşary ýagdaýda galýar.
Neşir bu ýerde hiç hili kanun bozulma ýa-da galp emeller barada gep gitmeýändigini belleýär. Hasapdan daşary borçnamalar heniz ulanmaga berilmedik taslamalary maliýeleşdirmegiň çäginde ýüze çykýar. Täze maglumat merkezleri işe girizilenden soň, degişli borçnamalar kompaniýalaryň resmi hasabatlarynda peýda bolar.
Seljerijiler borjuň uly göwrüminiň takmynan 420 milliard dollar bilen Meta kompaniýasyna düşýändigini çaklaýarlar. Bu hasap onuň resmi taýdan görkezilen borjundan üç esse töwerek köpdür. Oracle kompaniýasynda bolsa soňky dört ýylyň içinde gizlin borçlar 30 esseden gowrak artyp, 273 milliard dollara ýetdi. Bu ýagdaý kompaniýanyň ABŞ-nda emeli aň ulgamlary üçin maglumat merkezlerini gurmak boýunça geçirilýän «Stargate» taslamasyna gatnaşmagy bilen baglanyşdyrylýar.
Täze taslamalary maliýeleşdirmek üçin kompaniýalar obligasiýalary işjeň çykarýarlar we aksiýalaryň goşmaça paýnamalaryny köpeldýärler. Şol bir wagtyň özünde, Nikkei Asian Review neşirinde bellenilişi ýaly, gümürtik usullar arkaly iri maýadarlara edilen «kölegeli karzlaryň» hem göwrümi hem artýar.
Seljerijiler hasaplama infrastrukturasyna maýa goýumlarynyň çalt ösmeginiň uly maliýe töwekgelçilikleri bilen utgaşýandygyny-da duýdurýarlar. Olaryň arasynda maglumat merkezleriniň kuwwatynyň has artyk çykmagy, taslamalardan garaşylýan girdejiniň çak edilişinden pes bolmagy we netijede berginiň öňküden-de artmagy ýaly ätiýaçlar bar.
