Tesla amerikan kompaniýasy özüniň 10 millionynjy elektromobilini çykarandygyny yglan etdi. Ýubileý ulagy Kaliforniýa ştatynyň Frimont şäherindäki zawodynda ýygnaldy.
Birinji ýarym ýyllygyň jemleri boýunça kompaniýa bütin dünýädäki müşderilere 830 müňden gowrak maşyn gowşurdy. Ikinji çärýekde Tesla sarp edijilere 480 müňden gowrak ulag berdi – bu kompaniýanyň taryhynda ikinji çärýek üçin iň gowy netijedir. Önümçiligiň esasy möçberini ABŞ-daky we Hytaýdaky kärhanalar üpjün edýär, iň uly islegden peýdalanýanlar bolsa «Model 3» we «Model Y» modelleridir.
Ýubileý sepgide ýetmekde «Gigafactory Shanghai» uly goşant goşdy. 2019-njy ýylyň dekabrynda işe girizilen wagtyndan bäri kärhanada 4,5 milliondan gowrak elektrik ulagy çykaryldy. Häzir Şanhaýdaky zawodyň paýyna Tesla-nyň dünýä önümçiliginiň 45%-den gowragy düşýär, logistikany döwrebaplaşdyrmak bolsa Aziýanyň we Ýewropanyň bazarlaryna awtoulag üpjünçilik möhletlerini gysgaltmaga mümkinçilik berdi.
«Shanghai Securities News» neşiriniň maglumatyna görä, Tesla-nyň netijeleri dünýäniň awtoulag pudagynyň elektrik ulaglarynyň köpçülikleýin önümçiligine dowam edýän geçişini görkezýär. Kompaniýa hereket edýän kärhanalary döwrebaplaşdyrmak we täze önümçilik meýdançalaryny ösdürmek arkaly mundan beýläk-de ösmek mümkinçiligini saklap galýar.
Şol bir wagtyň özünde, meseleli ýagdaýlardan hem gaça durup bolanok. ABŞ-nyň Ýol hereketiniň howpsuzlygy milli müdirligi (NHTSA) öňki asma ulgamynyň näsazlyklary baradaky şikaýatlardan soň Tesla-nyň 1,19 milliondan gowrak elektrik ulagyna garşy barlag işine başlady.
2026-njy ýylyň 31-nji iýulynda başlanan barlag 2018–2020-nji ýyllarda çykarylan «Tesla Model 3» we 2021–2023-nji ýyllardaky «Model Y» awtoulaglaryny öz içine alýar. Ulag eýeleriniň 150-den gowrak resmi şikaýaty barlag üçin esas boldy.
Kemçilikleri barlamak müdirliginiň (ODI) maglumatyna görä, hünärmenler öňki aşaky asma tirseginiň özbaşdak aýrylmagy mümkin bolan ýagdaýlary öwrenýärler. Bu element tekeriň dogry ýagdaýda bolmagyna jogap berýär, onuň zyýan görmegi bolsa awtoulagyň dolandyryşyny ýitirmegine getirip biler.
Eger deslapky barlag çynlakaý meseläniň bardygyny tassyklasa, barlag kompaniýanyň taryhynda iň iri yzyna çagyryş çäreleriniň birine getirip biler. Barlag tamamlanýança, Tesla NHTSA-a tehniki resminamalary we degişli önümçilik zynjyrynyň kepillikli abatlaýyş işleri baradaky maglumatlary bermelidir.
