Amazon MGM Studios «Warhammer 40,000» wideo oýny esasynda animasiýa serialyny taýýarlaýar. Variety neşiriniň habar bermegine görä, taslamanyň ýerine ýetiriji prodýuseri Genri Kewill bolar.
Serial Prime Video-nyň «Gizlin dereje» («Secret Level») animasiýa antologiýasynyň spin-offy bolar. «Warhammer 40,000» boýunça epizod 2024-nji ýylda çykan birinji möwsümde hem görkezilipdi. Täze taslama Kewilliň baş roly ýerine ýetirjek kino ekranizasiýasy bilen birlikde alnyp barlar.
Serialyň awtordaşy we režissýory «Gizlin derejedäki» «Warhammer 40,000-e» bagyşlanan epizody düşüren Deýw Wilson bolar. Ol ssenarini «Howa hökmürowanlary» («Masters of the Air») we «Ýarag arkadaşlary» («Band of Brothers») seriallary bilen tanalýan Jon Orloff bilen birlikde ýazýar.
Serialyň sýužeti gizlin saklanýar. Ondan diňe gaýry planetalylardan abanýan howplara garşy göreşmekde ýöriteleşen kosmos desantçylarynyň, ýagny Ajal Garawulynyň ýokary derejeli söweşijileriniň boljakdygy mälimdir.
Wilsonyň aýtmagyna görä, «Gizlin dereje» - bu diňe bir antologiýa bolman, eýsem, ägirt uly wakalary şöhlelendirmek üçin meýdançadyr. Režissýor 20 ýyldan gowrak wagt bäri «Warhammer 40,000» boýunça uzak bir wakany surata düşürmek isländigini aýtdy.
Amazon «Warhammer 40,000-den» başga-da oýun franşizalaryny ekranlaşdyrmagy dowam edýär. Prime Video eýýäm «Fallout» serialyny muşdaklaryna hödürleýär, şeýle-de olar «Tomb Raider», «God of War», «Life Is Strange», «Mass Effect» we «Wolfenstein» taslamalarynyň üstünde işleýärler.
