Sem Mendesiň "The Beatles" baradaky terjimehal filminiň artistleri meşhur "Abbey Road" albomynyň daşky sahabyny gaýtadan janlandyrdylar. Variety neşiriniň habar bermegine görä, bu sahna 1969-njy ýylda aýdym-saz toparynyň edil şol surata düşen ýerinde — Londonyň Abbey Road köçesindäki pyýada geçelgede surata düşürildi.
Meýdançanyň ýokardan dron arkaly alnan wideolary sosial mediada çalt ýaýrady.
Jon Lennonyň keşbini janlandyrýan Harris Dikinson öňde ak eşikde ýöräp barýar. Onuň yzyndan Ringo Starryň keşbinde Barri Keogan, Pol Makkartniniň keşbinde Pol Meskal we Jorj Harrisonyň keşbinde Jozef Kwinn barýar.
Bu köpçülikleýin sahnanyň düşürilişine 80 aktýor gatnaşdy, köne awtoulaglaryň birnäçesi ulanyldy. Westminster geňeşi ilki ulaglaryň gatnawyna we syýahatçylara päsgel bermeginiň mümkindigi sebäpli, geçelgede surata düşürmekligi gadagan etmäge-de synanyşdy, ýöne ahyrsoňy rugsat berildi we ulag gatnawy wagtlaýynça togtadyldy.
"The Beatles - dört filmli kino wakasy" atly taslama dört sany doly metražly filmden ybarat bolar. Olarda wakalar gezekli-gezegine sazandalaryň her biriniň nukdaýnazaryndan gürrüň berler. Bu dört filmiň dördüsem 2028-nji ýylyň 7-nji aprelinde bir wagtda görkezişe çykar.
Variety-niň habar bermegine görä, bu Apple Corps-yň we The Beatles-iň mirasdüşerleri tarapyndan çeper film düşürmek üçin toparyň terjimehalyna we sazyna doly hukugy berlen ilkinji ýagdaýdyr. Üstesine, aýdymçy Pol Makkartniniň özi-de filmi düşürýänlere ak pata berdi, Meskal hakynda bolsa "örän ýakymly ýigit" diýip öwgüli sözleri aýtdy.
