Hytaý köp sanly suwasty enjamlary bir wagtda awtonom işletmek boýunça dünýä rekordyny goýdy. 116 sany kiçeňräk dron suw howdanynda öňünden kesgitlenen ugur boýunça, adamyň gözegçiligi bolmazdan, özbaşdak ýüzüşi amala aşyrdy.
Synaga Demirgazyk-Günbatar politehniki uniwersiteti we Xi’an Tianhe Maritime Technologies tarapyndan işlenip düzülen TH-618 dronlary gatnaşdy. Görkeziliş 29-njy awgustda Ginnesiň rekordlar kitabynyň wekilleriniň gözegçiligi astynda geçirildi we olar bu üstünligi resmi taýdan tassykladylar.
Dronlar 500 metre golaý uzynlykdaky howdanda öňünden kesgitlenen ugur boýunça, takmynan, 34 minut ýüzdüler we sazlaşykly hereketi saklap, bellenen aralygy geçdiler. Operatorlar ilki dronlary yzygiderli goýberip, soňra olaryň bortundaky awtonom ýüzüş ulgamlaryna dolandyryşy geçirdiler.
Her bir TH-618 öňünden kesgitlenen ugry saklamak üçin hakyky wagtda gelýän maglumatlary ulandy we daşky täsirler sebäpli gyşarma ýüze çykan ýagdaýynda öz ugruny özbaşdak düzedip bildi. Nawigasiýa üçin kamera esaslanýan, töweregindäki giňişligi seljermäge mümkinçilik berýän ulgamdan peýdalanylýar.
TH-618-iň uzynlygy 61 santimetre, ini 20 santimetre we agramy 5,1 kilograma golaýdyr. Ol 30 kilometre çenli ýol geçip, sekiz sagatdan gowrak işläp bilýär.
Suwasty enjamlarynyň köp sanlysynyň bir wagtda işledilmegi suwasty radiosignalyň ýaýramagynyň aýratynlyklary we aragatnaşyk ulgamlarynyň çäkli geçirijilik ukyby sebäpli çylşyrymly inženerlik meselelerini döredýär. Demirgazyk-Günbatar politehniki uniwersitetiniň aýtmagyna görä, bu synag has uly awtonom suwasty ulgamlaryny döretmekde öňegidişligi görkezýär.
Şeýle tehnologiýalaryň işlenip düzülmegi howada, gury ýerde we suw astynda işläp bilýän uçarmansyz ulgamlara bolan gyzyklanmanyň artmagy bilen baglanyşyklydyr.
