Režissýorlar Den Kwan bilen Deniel Şaýnertiň “Hemme zat hemme ýerde we birbada” filmi “Iň gowy film” nominasiýasynda “Oskar” baýragynyň eýesi boldy. Amerikan kinoakademiýasynyň 95-nji baýrak gowşurylyş dabarasy Los-Anjelesdäki Dolby teatrynda geçirildi.
Bu nominasiýada baýrak üçin dalaşgärleriň arasynda Jeýms Kemeronyň “Awatar: Suwuň ýoly”, Stiwen Spilbergiň “Fabelmanlar”, Martin MakDonanyň “Inişeriniň Banşisi”, Jozef Kosinskiniň “Top Gan: Mewerik”, Todd Fildiň “Tar”, Baz Lurmanyň “Elwis”, Ruben Estlundyň “Gussalyk üçburçlugy”, Edward Bergeriň “Günbatar frontda üýtgeşme ýok” we Sara Polliniň “Zenanlar diýýär” filmi görkezildi.
Film immigrant, kir ýuwulýan ýeriň eýesi Ewelin barada gürrüň berýär. Salgyt edarasyna baranynda baş gahrymanyň parallel älemlerde hereket edip bilýändigi we özüniň beýleki görnüşleriniň ýatlamalaryna we başarnyklaryna eýe bolup bilýändigi ýüze çykýar. Indi bolsa ol diňe bir bu dünýäni däl, eýsem tutuş multiälemi ýok etmek islän ýaramaz bir zada garşy durmaly bolýar.
Şeýle-de, film iň gowy režissýorlyk, iň gowy original ssenariýa we iň gowy montaž üçin baýraga mynasyp boldy. Kartina jemi ýedi sany “Oskar” heýkelini aldy.
Beýleki nominasiýalar
Iň gowy dokumental gysga metražly film Kartiki Gonsalwes bilen Gutit Monginiň “Pilleri jadylaýjylar” işi boldy. Bu nominasiýada “Oskara” russiýaly Maksim we Ýewgeniý Arbugaýewleriň “Çykalga” lentasy hem dalaş etdi.
Iň gowy aýdym üçin “Oskary” “RRR: Golaýda rewolýusiýanyň gohy turýar” hindi filminden “Naatu Naatu” aldy. Bu nominasiýada beýlekiler bilen bir hatarda Riannanyň we Ledi Gaganyň hem işleri bardy.
Jeýms Kemeronyň “Awatar: Suwuň ýoly” we Jozef Kosinskiniň “Top Gan: Mewerik” filmleri hem, degişlilikde, iň gowy wizual effektler we iň gowy ses üçin “Oskar” aldylar. Şeýle-de, kinoakademiýanyň baýragy bilen “Gara Babyr: Wakanda baky” hem sylaglandy, ol “Iň gowy egin-eşik dizaýny” nominasiýasynda “Oskar” aldy.
