Kolumbiýada geçirilen prezident saýlawlarynyň ikinji tapgyrynyň netijelerine görä, aklawçy Abelardo de la Espriella ýeniji boldy.
Saýlaw uçastoklarynyň 99,99%-inden gelen maglumatlar işlenip taýýarlanandan soň, ol jemi 12 959 542 ses (49,66%) toplamagy başardy we 12 708 712 ses gazanan (48,7%) çepçi güýçleriň wekili Iwan Sepedany yzda galdyrdy.
Saýlawlaryň ikinji tapgyry 21-nji iýunda geçirildi. Espriella prezidentlik wezipesine resmi taýdan 7-nji awgustda girişer.
Barrankiýa şäherinde öz tarapdarlarynyň öňünde çykyş eden täze prezident goldaw berendikleri üçin saýlawçylara minnetdarlyk bildirdi. Ol ýurduň Konstitusiýasyna ygrarly bolup, oňa pugta eýerjekdigine hem-de ähli raýatlaryň, şol sanda öz bäsdeşine ses berenleriň hem hukuklaryny gorajakdygyna söz berdi.
De la Espriella saýlawlara özi tarapyndan esalandyrylan «Watan goragçylary» atly garaşsyz halk hereketiniň adyndan gatnaşdy. Ol Kolumbiýanyň raýatlygyndan başga-da Italiýanyň we ABŞ-nyň hem raýatydyr.
Saýlaw kampaniýasynyň dowamynda syýasatçy häzirki prezident Gustawo Petronynyň ykdysadyýet we durnukly howpsuzlyk ulgamyndaky alyp barýan syýasatyny yzygiderli tankyt edip geldi. De la Espriella prezident wezipesinde hökümetiň işgärler sanyny 40% azaltmagy, salgyt binýadyny giňeltmegi, şeýle-de jenaýatçylyga garşy örän berk we netijeli zarba urmagy wada berdi.
