Peruwyň Konime şäherinde häkim teňňe zyňmak arkaly kesgitlendi. Bu barada «La República» neşiri ýazýar.
4-nji oktýabrda geçirilen şäher häkimliginiň saýlawlarynda «Biz — Peru» partiýasyndan Ruben Kispe Kapahanýa we onuň garşydaşy «Hemmeler üçin ýurt» partiýasyndan Salomino Mamani Kispe birmeňzeş mukdarda ses toplady. Her birine berlen sesleriň sany 671 boldy. Bu deňme-deňlik ähli protokollar sanalandan soň tassyklanyldy.
Şondan soň ýörite komissiýa köpçülikleýin bije çekilişigi geçirdi. Ilki bilen, dalaşgärleriň wekilleri kimiň teňňe zyňjakdygyny kesgitlemek üçin belgilenen kagyzlary çekdi. Ilkinji saýlamak hukugyny «Biz — Peru» partiýasynyň tarapdary aldy. Wekil gymmaty bir sol bolan bäş teňňäniň birini saýlap, tugraly tarapyna görkezdi. Bäsdeşine bolsa ters tarapy düşdi. Teňňe zyňlanda, tugra tarapy üstde galdy, bu hem Kispe Kapahanýa ýeňiş getirdi.
Syýasatçy ýerli köpçülikleýin habar serişdelerine özüniň şeýle saýlawlara ilkinji gezek gatnaşandygyny we bu ýere ynam bilen gelendigini aýtdy. Ol öz wekiline tugra tarapyny saýlamagy hut özüniň maslahat berendigini boýun aldy.
Ýerli saýlawlarda sesler deň gelen ýagdaýynda teňňe zyňmak usuly Peruwyň kanunçylygynda resmi taýdan göz öňünde tutulýar. Öň komissiýalar dürli usullary, meselem, şar çekmegi ulanýardy. Ýöne Milli saýlaw eminler topary birmeňzeş tertibi kesgitledi: indi şeýle ýagdaýlar üçin diňe bir sol nominaly bolan teňňe ulanylýar.
