Toyota amerikan bazary üçin 2027-nji model ýylynyň Corolla Cross krossowerini hödürledi. Awtoulag öňki tehniki düzümini saklap galdy, ýöne öndüriji wersiýalaryň sanawyna gaýtadan seretdi we bahalary sazlady.
Tygşytlylygy halaýanlar üçin esasy täzelik — gibrid wersiýasynyň iň elýeterli başlangyç S görnüşi aýryldy. Indi Corolla Cross Hybrid modelini diňe has baý enjamlaşdyrylan SE we XSE görnüşlerinde satyn alyp bolar. Şeýle krossowerler 196 at güýjüni berýär, diňe doly ýörediji ulgam bilen üpjün edilýär we garyşyk siklde 100 kilometre bary-ýogy 5,6 litr ýangyç sarp edýär.
Adaty benzin wersiýasy öňküsi ýaly wariator bilen utgaşýan 169 at güýjündäki 2,0 litrlik hereketlendiriji bilen enjamlaşdyryldy. Alyjylara öňdäki, şeýle hem doly ýöredijili görnüşler elýeterlidir.
Içki bezegde üýtgeşmeler ujypsyz boldy. Başlangyç wersiýalar multimediýa ulgamynyň 8 dýuýmlyk ekranyny alýar, ýokary XLE we Hybrid XSE görnüşlerinde bolsa 10,5 dýuýmlyk displeý we 12,3 dýuýmlyk sanly enjam paneli oturdylýar.
Ähli görnüşler simsiz «Apple CarPlay» we «Android Auto» ulgamlaryny goldaýar, şeýle hem Toyota Safety Sense 3.0 howpsuzlyk ulgamlarynyň toplumy bilen enjamlaşdyrylýar (ol sazlanýan kruiz-gözegçilik, zolakda saklamak we çaknyşmalaryň öňüni almak ulgamyny öz içine alýar).
Benzinde işleýän 2027-nji model ýylynyň Toyota Corolla Cross awtoulagynyň bahalary öňki ýöredijili L wersiýasy üçin 25 535 dollardan başlanýar. Iň elýeterli gibrid bolsa azyndan 31 415 dollara düşer.
