Paramount Skydance we Warner Bros. Discovery kompaniýalary 12 sany amerikan ştatynyň birleşigi we ABŞ-nyň Ssenariçiler gildiýasy tarapyndan başlanan kazyýet işinden soň birleşmek baradaky şertnamany jemlemegi tas bir ýyl yza süýşürmäge razy boldy.
Ilkibaşda geleşik Kaliforniýanyň federal kazyýeti tarapyndan iýul aýynda wagtlaýyn petiklenenden soň, bu amal eýýäm awgust aýynyň başynda dowam etdiriler diýlip çak edilipdi. Ýöne taraplar şertnamany ýapmagy çen-takmyn 2027-nji ýylyň 1-nji iýunyna çenli ýa-da oňa garşy çykyş edýän ştatlar bilen ylalaşyk gazanylýança yza süýşürmek barada ylalaşdy.
Şertnama 111 milliard dollar diýlip bahalandyrylýar. Onuň şertlerine görä, 30-njy sentýabrdan soň Paramount gijikdirilen her bir gün üçin Warner Bros.-yň paýdarlaryna 7 million dollardan tölär, şol sebäpli hem kompaniýa bu amalyň çaltrak ýapylmagyna gyzyklanma bildirýär.
Birleşmek amalynyň yza süýşürilmegi baradaky habarlaryň esasynda Paramount Skydance-iň paýnamalary soňky bir ýylyň içinde iň pes derejä düşdi.
Birleşme üstünlikli tamamlanan halatynda Paramount Skydance «Harry Potter», «DC», «The Matrix», «Mad Max», «Scooby-Doo», «The Lord of the Rings» we «Game of Thrones» ýaly franşizalara bolan hukuklary alar. Warner Bros. Games-iň oýun bölümine bolsa «Mortal Kombat», «Injustice», «Batman: Arkham», «LEGO» oýunlary we «Hogwarts Legacy» ýaly oýunlary bilen meşhur bolan NetherRealm, Rocksteady, TT Games, Avalanche Software we beýleki studiýalar girýär.
