Arkadag şäherinde futbol eminleri üçin FIFA-nyň halkara okuw maslahaty geçirildi.
Alty günüň dowamynda gatnaşyjylar oýun düzgünlerindäki üýtgeşmeleri öwrendi, amaly başarnyklaryny kämilleşdirdi we ýörite taýýarlyk geçdi.
Trening 30-njy iýuldan 4-nji awgusta çenli dowam etdi. Maksatnama üç ugra gönükdirildi: täze düzgünleri we olaryň iş ýüzünde ulanylyşyny öwrenmek, eminligiň hilini we tarapgöýsüzligini ýokarlandyrmak, şeýle hem eminleriň fiziki we taktiki taýýarlygyny ösdürmek.
Sapaklaryň dowamynda eminler ýöriteleşdirilen testleri ýerine ýetirdi we çylşyrymly oýun ýagdaýlarynyň jikme-jik wideoseljermesine gatnaşdy. Şeýle format dawaly ýagdaýlarda çözgüt kabul etmegi özleşdirmäge we olara FIFA-nyň häzirkizaman talaplaryna laýyklykda baha bermäge mümkinçilik berdi.
Gatnaşyjylar alnan bilimleriň milli derejedäki oýunlarda-da, halkara ýaryşlarynda-da eminligiň durnuklylygyny we adalatlylygyny ýokarlandyrmaga ýardam etjekdigini belledi.
