McDonald’s kompaniýasynyň paýnamalary 5 göterime golaý arzanlap, 2025-nji ýylyň aprel aýyndan bäri iň uly pese gaçyşy görkezdi. Associated Press neşiriniň habar bermegine görä, bazaryň şeýle duýdansyz üýtgemegine kompaniýanyň giň gerimli döwrebaplaşdyryş maksatnamasyny yglan etmegi sebäp boldy.
Kompaniýa geljekki on ýylyň dowamynda dünýäniň dürli ýurtlaryndaky 46 müň restoranyny täzelemek üçin 8,5 milliard dollar maýa goýmagy meýilleşdirýär. Maýa goýumlaryň möçberi we çykdajylaryň ýokary bolmagy maýadarlary haýran galdyrdy.
Maksatnama restoranlaryň işine düýpli üýtgeşmeleri girizmegi göz öňünde tutýar. Restoranlarda çaparlaryň sargytlary alyp gitmegi üçin ýörite tekjeler, açyk kofe meýdançalary, täzelenen aşhanalar we giňeldilen çagalar meýdançalary peýda bolar.
2028-nji ýyla çenli 20 müň restoranda sargytlaryň dogry ýygnalandygyny barlamak üçin gözegçilik terezileri oturdylar. Tehnologik täzelenmeleriň esasy bölegi Google bilen bilelikde işlenip taýýarlanan ArchIQ platformasyny we awtokassa nokatlarynda sargytlary kabul etmek, şeýle hem önümleriň hasabyny awtomatlaşdyrmak üçin niýetlenen Archy emeli aň kömekçisini ornaşdyrmakdan ybarat bolar.
Üýtgeşmeler tagamnama hem giriziler. Restoranlar ulgamy elde una bulap taýýarlanylýan towuk etini ulanmak boýunça synaglaryny giňeldýär we beloga baý täze önümleri goşýar. McDonald’s bedeniniň agramyna gözegçilik edýän we horlanmak üçin derman serişdelerini ulanýan müşderileriň isleglerine uýgunlaşmaga çalyşýar.
Maksatnamanyň maliýeleşdirilmegi tapgyrlaýyn amala aşyrylar. Bu iş aýratyn franşiza eýeleriniň we ýerli bazarlaryň taýýarlygyna görä alnyp barlar. Kompaniýanyň hasaplamalaryna görä, iş netijeliliginiň ýokarlanmagy ABŞ-daky ortaça bir restoranyň ýyllyk goşmaça girdejisini, takmynan, 100 müň dollar artdyrar. Bu serişdeleriň bir bölegini franşiza eýeleri restoranlaryna gaýtadan maýa goýmak üçin ulanyp biler.
