Gyrgyzystanyň mekdepleri resmi taýdan 12 ýyllyk bilim ulgamyna geçirildi. Hökümet degişli kadalaşdyryjy hukuk namalaryna üýtgetmeler we goşmaçalar girizdi.
Umumybilim berýän edaralar baradaky nusgawy düzgünnamada umumy bilimiň birinji derejesiniň alty ýyl, ikinji derejesiniň üç ýyl, üçünji derejesiniň bolsa üç ýyl boljakdygy bellenildi. Şunlukda, okuwyň dowamlylygy 12 ýyla barabar bolar.
Okuw ýylynyň dowamlylygy azyndan 34 okuw hepdesinden ybarat bolar. Birinji synplar (32 hepde) we ikinji synplar (33 hepde) üçin kadadan çykma göz öňünde tutuldy. Dynç alyş günleriniň umumy dowamlylygy azyndan 30 gün, tomusky dynç alyş bolsa azyndan 14 hepde bolar.
Bu çözgüt umumybilim berýän edaralarda okuw ýylynyň iň amatly dowamlylygyny kesgitlemek we okuw ýüküni dogry paýlamak maksady bilen kabul edildi.
Karar resmi taýdan neşir edilen gününden 10 günden soň güýje girer.
