Ýewropanyň futbol assosiasiýalary birleşigine (UEFA) agza ýurtlaryň futbol federasiýalary FIFA-nyň dünýä çempionatyna bolan hukuklaryň bir bölegini hususy maýadarlara satmak meýilnamalaryna närazylyk hökmünde ýaryşlara gatnaşmakdan ýüz öwürjekdiklerini bildirdi.
«Daşky maýadarlar FIFA-nyň ýaryşlaryna eýeçilik hukuklaryny alan pursatyndan başlap, futbol hemişelik üýtgeýär […]. Şol pursatdan başlap, her bir çözgüt — goý, ol halkara senenamasy, ýaryşlaryň formaty ýa-da futbolyň geljegini kesgitleýän meseleler bolsun — oýnuň öz bähbitleri üçin däl-de, paýdarlaryň bähbitleri üçin kabul ediler. Dünýä futbolynda bu modele orun ýokdur» – diýlip, UEFA-nyň saýtynda habar berilýär.
Habarda assosiasiýanyň 55 agzasynyň ählisiniň bu garaýşy goldandygy nygtalýar.
28-nji iýulda «The Times» neşiri FIFA-nyň prezidenti Janni Infantinonyň dünýä çempionatlaryndaky paýlary hususy maýadarlara satmak isleýändigini ýazdy. Maýa goýum toparyna Donald Trampyň giýewisi Jared Kuşneriň kiçi dogany Joşua Kuşner tarapyndan esaslandyrylan Thrive Capital kompaniýasy ýolbaşçylyk edip biler.
Soňra bu meýilnamalary FIFA-nyň özi hem tassyklady. Şol bir wagtyň özünde Infantino gürrüňiň hukuklaryň özüni bermek barada däl-de, diňe ýaryşy geçirmek boýunça amaly işleri daşky kompaniýalara tabşyrmak barada barýandygyny öňe sürdi.
FIFA-nyň teklibini UEFA-dan başga-da beýleki yklym konfederasiýalary hem tankytlady. Tankytçylary, aýratyn hem, bu pikiriň milli federasiýalar bilen degişli ýagdaýda maslahatlaşylmazlygy gaharlandyrdy.
«Futbol üçin şeýle möhüm teklibiň gizlinlikde işlenip düzülmegi we oýny dolandyrýanlar bilen hiç hili mazmunly geňeşmeler geçirilmezden diýen ýaly tassyklanmaga ýetirilmegi jogapkärsizlikdir we ýol berilmesizdir. Bu diňe bir ýolbaşçylygyň uly şowsuzlygy däl, eýsem FIFA-nyň dünýä futbolynyň goragçysy hökmündäki borçlaryny ýerine ýetirmekden ýüz öwürmegidir.
Bütin dünýädäki milli assosiasiýalara indi ultimatum goýuldy: esasy futbol ýaryşlarynyň yza gaýtaryp bolmajak eýelenmegi bilen razylaşmak ýa-da onuň netijeleri bilen ýüzbe-ýüz bolmak. Bu «demokratik çözgüt» däl-de, eýsem gorkuzmak arkaly dolandyrmakdyr — dünýä futboly barada alada etmek ynanylan gurama mynasyp bolmadyk mejbur ediş hereketidir» – diýlip, UEFA-nyň beýanatynda aýdylýar.
2030-njy ýyldaky nobatdaky dünýä çempionaty Ispaniýada, Portugaliýada we Marokkoda geçiriler. Şol ýurtlaryň ilkinji ikisi UEFA-nyň düzümine girýär.
