Türkmenistanda geçirilýän «Bedew bady: güýç we gözellik» atly halkara dokumental kinolaryň bäsleşigine eýýäm GDA-nyň dürli ýurtlaryndan ýigrimi töweregi iş gelip gowuşdy. Gatnaşmaga gyzyklanma bildirýänleriň köplügi üçin guramaçylar arzalary kabul etmegi 30-njy awgusta çenli uzaltdy.
Bäsleşigi Türkmenistanyň Telewideniýe, radiogepleşikler we kinematografiýa baradaky döwlet komiteti «Türkmen atlary» döwlet birleşigi bilen bilelikde gurnaýar. Taslama Arkalaşygyň döwletleriniň medeni we ynsanperwer hyzmatdaşlygyny ösdürmäge gönükdirilendir.
Eminler toparyna GDA ýurtlarynyň belli žurnalistleri, atçylyk ulgamynyň hünärmenleri, teleoperatorlar we media-prodýuserler girdi.
Gatnaşyjylaryň arasynda türkmen dokumental kinoçylary hem bar. Olar ahalteke atlaryna bagyşlanan «Behişdi bedewler» filmini hödürledi.
Telewizion bäsleşigiň çäklerinde «Iň gowy tele-film», «Atçylygyň taryhy baradaky iň gowy film», «Atçylyk sporty baradaky iň gowy film», «Bedewiň keşbini çeperçilik bilen beýan edendigi üçin», «Eminleriň baýragy» ugurlary boýunça ýeňijiler saýlanar.
