Kaliforniýanyň Marin etrabynyň ýaşaýjysy Maýa Kristi 1 mln dollar möçberdäki puluny mekdep mugallymlaryna paýlady. Bu barada People neşiri habar berýär.
Waka 13-nji awgustda bolup geçdi. Şol gün Ross-Welli mekdep etrabynda zähmet çekýän 110-a golaý mugallym adaty iş duşuşygyna çagyrylandyrys diýen pikir bilen mekdebe ýygnandylar. Emma çäräniň deregine olaryň her birine 9 161,70 dollar möçberinde çek gowşuryldy. Biraz soňra serişdeleriň etrabyň ýaşaýjysy Maýa Kristi tarapyndan bölünip berlendigi belli boldy.
Neşiriň berýän maglumatlaryna görä, bu zenan döwlet tarapyndan bilim ulgamyna ýeterlik mukdarda pul bölünip berilmeýänligini adalatsyzlyk hasaplap, mugallymlary goldamak üçin öz ýanyndan hem mümkin boldugyça kömek etmek isläpdir.
Mugallymlar bu garaşylmadyk pul kömegi üçin minnetdarlyklaryny bildirdiler. Olar alnan puly öz şahsy hajatlary üçin ulanyp bilerler.
Ross-Welli mekdep etraby Kaliforniýanyň iň baý sebitleriniň biri hasaplanýan Marin etrabynda ýerleşýär. Şeýle-de bolsa ol ýerde bilim ulgamynyň maliýeleşdirilişi ep-esli derejede pesligine galýar.
