19-njy sentýabrda Baku şäherinde geçirilen Türki dünýäniň kompozitorlarynyň birinji gurultaýynyň çäklerinde Türki dünýäniň kompozitorlar birleşiginiň («Turkic Union of Composers» – «TUC») döredilýändigi yglan edildi. Bu barada Türki medeniýetiň we mirasyň halkara gaznasynda habar berdiler.
Gurultaýa Azerbaýjanyň, Gazagystanyň, Gyrgyzystanyň, Türkiýäniň, Özbegistanyň, Türkmenistanyň we Wengriýanyň öňdebaryjy sazçylyk guramalarynyň wekilleri gatnaşdylar.
Olar Baku jarnamasyna gol çekdiler. Bu resminama türki döwletleriň kompozitorlarynyň, sazşynas alymlarynyň, bagşy-sazandalarynyň, konserwatoriýalarynyň, saz akademiýalarynyň we döredijilik birleşikleriniň arasynda hemişelik hünär hyzmatdaşlygyny ýola goýmak üçin esas boldy.
Şeýlelikde, bu ýurtlaryň kompozitorlarynyň arasyndaky hyzmatdaşlyk ilkinji gezek bitewi institusional binýada eýe boldy we uzak möhletleýin halkara meýdançasyna öwrüldi.
«Biz türki halklaryň baý mirasynyň täze eserleriň döredilmegine, hünär hyzmatdaşlygyna we halkara medeni dialogyna çeşme boljak janly saz giňişligini döretmegi maksat edinýäris. Baku şäherinde geçirilen ilkinji gurultaý we Türki dünýäniň kompozitorlar birleşiginiň döredilmegi türki dünýäniň saz diplomatiýasynyň taryhynda täze sahypany açýar» diýip, Türki medeniýetiň we mirasyň halkara gaznasynyň prezidenti, professor Aktoty Raimkulowa belledi.
TUC türki dünýäniň döredijilik mümkinçiligini birleşdirmegi, häzirki zaman kompozitorçylyk mekdeplerini goldamagy, täze eserleriň döredilmegine ýardam bermegi we türki halklaryň sazlaryny halkara sahnalarynda giňden öňe sürmegi maksat edinýär.
Türki dünýäniň kompozitorlarynyň birinji gurultaýy 18–20-nji sentýabr aralygynda Uzeir Hajybeýliniň XVIII halkara saz festiwalynyň çäklerinde geçirildi.
