«Polo» harasaty Meksikanyň Ýuwaş ummanynyň kenarýakasyna ýetip, jaýlaryň üçeklerini gopardy, agaçlary ýykdy we ýollary suw basdyrdy. Ýöne häkimiýetleriň deslapky maglumatyna görä, uly zeper ýa-da adam pidalary hasaba alynmady.
Duşenbe güni giç agşam «Polo» Günorta Kaliforniýa Aşaky ştatynyň günorta bölegine üçünji derejeli harasat hökmünde ýetdi. Bu ýerde tizligi sagatda 175 kilometre ýetýän güýçli ýel turdy. Soňra ol Aşaky Kaliforniýa ýarymadasyndan we Kaliforniýa aýlagyndan geçip, güýjüni ýitirdi hem-de Meksikanyň içki bölegine, demirgazyk-gündogara tarap süýşdi.
Harasatyň jümmüşine düşen Las-Barrankas atly balykçylar şäherçesinde derýanyň joşmagy zerarly köpri ýykyldy. Şol sebäpli şäherçä barmak kynlaşdy. Günortada, Günorta Aşaky Kaliforniýa ştatynyň kenarýaka şäherlerinde, şol sanda Adolfo-Lopes-Mateos we Puerto-San-Karlosda köçeleri suw basdy we elektrik togy kesildi. Ýaşaýjylar tiz wagtda howpsuz ýere göçürilip, mekdeplerde gurnalan wagtlaýyn merkezlerde ýerleşdirildi.
Goňşy Sonora ştatynda möhüm infrastruktura degişli bolmadyk ähli kärhanalaryň işi öňünden togtadyldy. Ştatyň paýtagty Ermosillýoda we başga-da birnäçe şäherde okuw sapaklary, sport ýaryşlary hem-de köpçülikleýin çäreler ýatyryldy.
Energetika kompaniýasy elektrik üpjünçiligini dikeltmegiň ugruna çykdy. Häkimiýetler ýaşaýjylaryň öýlerini abatlamaga we suw basan köçeleri arassalamaga kömek etjekdiklerini mälim etdi. Günorta Aşaky Kaliforniýa ştatynyň gubernatory Wiktor Kastro aýdyşy ýaly, ýerli infrastruktura ýeten zeper beýle uly däl.
Meksikanyň Harby-deňiz güýçleri ilata kömek bermek üçin sebite içinde azyk önümleri, agyz suwy, agyr tehnikalar, ýel berilýän gaýyklar we dikuçar bolan gämini ugratdy.
«Polo» kem-kemden güýjüni doly ýitirýän mahaly, Meksikanyň kenaryndan günortada täze tropiki tupan — «Reýçel» güýçlenip başlady. Çaklamalara görä, ol penşenbe gününe çenli güýçli harasata öwrüler. Ýöne häzirki maglumatlara görä, ol Meksikanyň kenarynyň ugry bilen parallel hereket edip, gury ýerden sowa geçmeli.
