ABŞ-nyň prezidenti Donald Tramp gyzyl reňkleýji goşulan dizel ýangyjyny ulanmaga çäklendirmeleri wagtlaýynça aýyrmak baradaky permana gol çekdi. Ol bu karary Nebraska ştatynyň Grand-Aýlend şäherinde geçirilen saýlawlaryň öň ýanyndaky mitingiň dowamynda yglan etdi diýip, Ak Tamyň metbugat gullugy habar berýär.
"Gyzyl" dizel ýangyjynyň hili adaty dizel ýangyjyndan tapawutlanmaýar. Onuň reňki diňe ýangyjyň gallon üçin 24 sent möçberinde federal aksiz salgydyndan boşadylandygyny ýa-da azaldylan möçberde salgyt salynýandygyny görkezýär. Salgyt ýeňillikleri sebäpli, adatça, ony diňe oba hojalygynda ýa-da gurluşykda ýolsuzlyk tehnikalary üçin ulanmaga rugsat berilýärdi.
Indi reňkleýjili ýangyjy diňe jemgyýetçilik ýollaryndan beýleki ýerlerde ulanmak talaby aýryldy. Trampyň sözlerine görä, perman ony islendik maksat üçin satyn almaga rugsat berýär. Prezident bu çäräni azyk önümleri bilen birlikde harytlaryň bahalarynyň peselmegine getirjek çykdajylary azaltmak çäresi diýip atlandyrdy.
Ak Tamyň maglumatlaryna görä, bu ýeňillik 2026-njy ýylyň ahyryna çenli güýjünde galar.
