Lamborghini kompaniýasy Saud Arabystanyndaky müşderilerine arap çölleriniň alaňlaryndan ylham alnyp bezelen iki sany ýörite «Revuelto» superkar modelini gowşurdy. «Ad Personam KSA Edition» diýlip atlandyrylan bu awtoulaglarda olaryň aýratyn iki nusgada öndürilendigini görkezýän «1 of 2» (ikiden biri) diýen ýazgy ýerleşdirildi.
Awtoulaglaryň daşky reňkiniň we käbir bezeg bölekleriniň tapawutlanýandygyna garamazdan, ikisi-de umumy äheňde ýerine ýetirilipdir. Salonda «Nero Ade» diýlip atlandyrylýan gara reňkli deri we karbon süýüminden ýasalan bölekler ulanylypdyr. Awtoulagyň kürsülerindäki keşdeler bolsa alaňlaryň şekilini gaýtalaýar.
Salonyň yzky diwarynda arapça «Legacy» (Miras) diýlip ýazylan ýörite bezeg paneli ýerleşdirilipdir. Şeýle-de awtoulaglaryň daş ýüzünde olaryň ýörite tapgyra degişlidigini görkezýän ýadygärlik nyşany oturdylypdyr.
Ulaglaryň eýelerine gowşurylyş dabarasy Italiýanyň Sant-Agata-Bolonýeze şäherindäki Lamborghini zawodynyň çäginde geçirildi. Täze awtoulaglar kompaniýanyň ştab-kwartirasynda hut eýeleriniň özlerine gowşuryldy.
Ýörite döredilen bu awtoulaglaryň bahasy aýan edilmedi.
