SpaceX taryhda ilkinji gezek orbital uçuşdan soň Starship kosmos gämisini uçuryş diňine yzyna gaýtaryp aldy. Uçup gelýän raketany Günorta Tehasdaky Mechazilla ulgamynyň mehaniki manipulýatorlary gapdy.
Starship 13-nji noýabrda Tehasdaky SpaceX-iň meýdançasyndan uçuryldy. Uçuş wagtynda ol orbita 26 sany Starlink hemrasyny çykardy we kosmosda, takmynan, 22 sagat bolup, Ýeriň töwereginde 14 aýlaw etdi. Şondan soň gämi uçuryş meýdançasyna tarap aşak inmäge başlady we bu ýerde mehaniki manipulýatorlar tarapyndan tutuldy.
Şol bir wagtyň özünde, SpaceX bu gezek Super Heavy basgançagyny tutmaga synanyşmady. Çünki onuň hereketlendirijileri yza gaýdyş wagtynda möhletinden ir öçdi. Şondan soň ugrukdyryjy ulgam basgançagy awtomatik ýagdaýda suwa tarap gönükdirip, öz-özüni ýok etmek prosedurasyny işjeňleşdirdi. Super Heavy Meksika aýlagynyň üstünde ýaryldy.
Kompaniýa Starship-iň yzyna gaýtarylmagynyň gämini köp gezek ulanmaga mümkinçilik berýändigini belleýär. Bu bolsa gäminiň gaýtadan ulanylmagyny tizleşdirmek we çykdajylaryny azaltmak üçin möhümdir. Gäminiň we basgançagyň ikisini hem şol bir wagtda tutmak başartmasa-da, kompaniýa mundan öň birinji basgançaklary eýýäm üç gezek üstünlikli tutupdy.
