ABŞ-nyň Filadelfiýa şäherinde geçirilen «The Big Dill» atly marinada ýatyrylan hyýarlar festiwalynda birbada iki sany rekord goýuldy. Olaryň biriniň eýesi amerikaly Molli Skaýler boldy. Ol çalt iýmek boýunça geçirilen bäsleşikde 6 minutyň dowamynda marinadlanan hyýaryň tas 3,5 kilogramyny iýmegi başardy.
Skaýler mundan 16 ýyl ozal goýlan öňki rekordy täzeledi. 2010-njy ýylda bir erkek kişi 6 minutyň dowamynda 5 funt 11 unsiýa (takmynan, 2,5 kg) hyýar iýipdi.

Bu üstünlik Molli Skaýleriň şeýle ýaryşlarda gazanan ilkinji üstünligi däl. Ol 2018-nji ýylda geçirilen «Wing Bowl 26» bäsleşiginde 30 minutyň dowamynda 501 sany towuk ganatyny iýmegi başarypdyr.
Festiwalda ýene bir rekord hyýar görnüşindäki geýimleri geýen gatnaşyjylar tarapyndan goýuldy. Bu rekordyň hasaba alynmagyna jemi 1597 adam gatnaşdy.

Ýöne Ginnesiň rekordlar kitaby Molli Skaýleriň gazanan üstünligini häzirlikçe resmi taýdan tassyklamady. Adatça, hödürlenen subutnamalary barlamak we rekordy resmi taýdan hasaba almak belli bir wagt talap edýär. Käbir ýagdaýlarda bu iş birnäçe aýa çenli çekip biler.