Apple kompaniýasy resmi taýdan iOS 26.5 täzelenmesini hödürledi. Bu täzelenme ulanyjylara täze funksional mümkinçilikleri hödürlemek bilen birlikde, howpsuzlyk ulgamyndaky 50-den gowrak kemçilikleri düzedýär.
Esasy üýtgeşmeler Messages messenjerine, Apple Maps karta serwisine, ýatlatmalar ulgamyna we aksessuarlar bilen baglanyşyk gurmak mehanizmlerine degişlidir.
Täzelenme aşakdaky täzeçillikleri öz içine alýar:
- RCS-ýazyşmalary üçin dolulygyna şifrleme: Messages programmasynda RCS formatly hatlar üçin doly şifrleme goldawy peýda boldy. Häzirki wagtda bu funksiýa beta-synag görnüşinde işleýär we kem-kemden ornaşdyrylýar. Şifrlemäniň elýeterliligi sebitiňize we öýjükli aragatnaşyk operatoryňyza baglydyr.
- Dinamiki diwarlyklar: Ulgama birnäçe dik zolaklardan ybarat bolan täze dinamiki diwarlyklar (oboýlar) goşuldy. Ulanyjylar taýýar nusgalary saýlap ýa-da reňkleri öz islegine görä utgaşdyryp bilerler.
- Apple Maps-da maslahat berilýän ýerler: Karta programmasyna Suggested Places funksiýasy goşuldy. Ulgam beýleki adamlaryň teswirlerine we ulanyjynyň soňky gözleg taryhyna esaslanyp, gyzykly künjekleri maslahat berýär. Şeýle hem, kompaniýa ABŞ-da we Kanadada Apple Maps-yň içinde mahabatlary görkezip başlamaga taýýarlanýar.
- Kämilleşdirilen ýatlatmalar ulgamy: Bildirişleri başga wagta geçirmek prosesi has takyk boldy. Ozalky «şu gün öýlän» ýa-da «ertir irden» ýaly belli bolmadyk wagtlara derek, indi «bir sagatdan ýatlat» ýa-da «sagat 15:00-da ýatlat» ýaly anyk saýlawlar elýeterli.
- Aksessuarlary awtomatiki baglanyşdyrmak: Magic Mouse, Magic Keyboard we Magic Trackpad enjamlary USB-C kabeli arkaly birikdirilende, ulgam Bluetooth baglanyşygyny awtomatiki gurýar. Bu bolsa kabel aýrylandan soň hem aksessuarlaryň bökdençsiz işlemegine mümkinçilik berýär.
- Howpsuzlyk düzedişleri: Işläp düzüjiler ulgamyň ýadrosy we aýry-aýry funksiýalar bilen baglanyşykly 50-den gowrak gowşak nokatlary aradan aýyrdylar. Esasy üns WebKit hereketlendirijisine berlip, onda maglumatlaryň syzmagyna sebäp bolup biljek on sany mesele düzedildi.
Mundan başga-da, Apple kompaniýasy 2026-njy ýylyň güýzünde iOS 27, iPadOS 27 we macOS 27 operasion ulgamlary bilen bilelikde suratlary redaktirlemek üçin täze emeli aň gurallaryny hödürlemäge taýýarlanýar:
- Extend («Giňeltmek»): Emeli aň suratyň çäklerinden çaşyny «çekmäge» kömek edýär. Ulgam suratyň fakturasyny we yşyklandyrylyşyny seljerip, kompozisiýany tebigy görnüşde doldurýar.
- Enhance («Gowulandyrmak»): Reňkleri we yşyklandyryşy awtomatiki usulda iň amatly ýagdaýa getirýär.
- Reframe («Kompozisiýany üýtgetmek»): Esasanam giňişlik suratlary üçin niýetlenen bolup, taýýar suratyň perspektiwasyny üýtgetmäge mümkinçilik berýär. Bu edil surata düşürilýän pursady kamera bir gyra süýşürilen ýaly täsir galdyrýar.
