Kolleksiýaçy Sergeý Çubraýew «Kino» rok toparynyň lideri Wiktor Soýuň öň näbelli bolan «Minutlaryň çagalary» («Дети минут») atly aýdymynyň kasseta ýazgysyny tapdy. Bu eser 1988-nji ýylda ýazylypdyr.
Kompozisiýa «Soýuz Mýuzik» leýbliniň täze, 17 minutlyk «Salam, Karl Gustaw» atly dokumental filminiň jemleýji böleginde ýaňlanýar.
Audioýazgy 1988-nji ýylyň 24-nji iýunynda Leningrad şäherinde edilipdir we köp ýyllaryň dowamynda SSSR-däki Şwesiýanyň öňki baş ilçisiniň gyzy Sara Okerreniň golunda saklanypdyr.
Sergeý Çubraýew ilki bilen aýdymyň tekstini «Zwuki Mu» toparynyň bas-gitaraçysy Aleksandr Lipniskiniň arhiwinden tapypdyr (Lipniski 2021-nji ýylda aradan çykypdy). Soý bu aýdymyň sözlerini onuň şahsy haýyşy boýunça ýazyp beripdir we köp wagtlap aýdymyň diňe tekstiniň saklanandygy çaklanylýardy.
Çubraýew: «Wiktor Soý bu aýdymy diňe ýakyn dostlary üçin aýdardy. Entek köpçülik üçin taýýar däldigi sebäpli magnitofona ýazdyrmagy gadagan ederdi» diýip belleýär.
Lipniskiniň özi 2008-nji ýylda «Kino» topary baradaky dokumental filminde bu eseri ilkinji gezek 1988-nji ýylda Moskwa şäherinde eşidendigini ýatlapdy. Lipniskiniň «Bu kompozisiýa toparyň täze albomynda peýda bolarmy?» diýen soragyna Soý: «Hergiz ýok. Ol köp adamy azara goýar» diýip, pert jogap beripdir.
Audioýazgyny tapmak üçin Çubraýew 1980-nji ýyllarda Leningrad şäherine gelen daşary ýurtlulary idegläp başlapdyr we netijede Sara Okerrene çenli ýetipdir. Ol ýere dynç almaga gelen şwesiýaly diplomatyň gyzy ýerli rokçylar bilen hem gatnaşýan ekeni. Haçan-da kolleksiýaçy aýdym hakda soranda ol: «Men ony pleýere ýazdyrypdym!» diýip jogap beripdir.
Çubraýewiň çaklamasyna görä, kompozisiýa «Alisa», «Telewizor» we «Ado» toparlarynyň döredijiligine edilen gizlin öýkünmeleri we salgylanmalary öz içine alýar.
«Kino» toparynyň lideri aradan çykandan soň, aýdym beýleki artistler tarapyndan hem ýerine ýetirilipdi. 1992-nji ýylyň 20-nji iýunynda «Lužniki» stadionynda geçirilen ýadygärlik konsertinde ony «Kino» toparynyň esaslandyryjylarynyň biri Alekseý Rybin we «Atas» topary ýerine ýetirdi. 2010-njy ýylda bolsa Wýaçeslaw Butusowyň «U-Piter» topary Raşid Nugmanowyň «Igla Remix» filmi (Soýuň özüniň hem surata düşen 1988-nji ýyldaky asyl filminiň dowamy) üçin aýdymyň kawer nusgasyny ýazdyrypdy.
