Argentinanyň häkimiýetleri döwlete maýa goýumlaryny çekmek şerti bilen daşary ýurtlulara raýatlyk bermek maksatnamasyny açmagy meýilleşdirýär. Bu barada Financial Times neşiri habar berýär.
Gazet çeşmeleriniň berýän maglumatyna görä, bu mümkinçilikden peýdalanmagyň iki şerti bar. Oňa laýyklykda, maýadarlar Argentinanyň pasportyny almak üçin ýa-ha 500 müň töweregi yzyna gaýtarylmajak pul serişdesini sowgat hökmünde bermeli ýa-da 1 mln dollar möçberinde döwlet borçnamalaryny satyn almaly bolarlar.
Şol bir wagtda neşir bu şertleriň entek üýtgedilip bilinjekdigini hem aýratyn belleýär. Ýöne maksatnama jogap berýän Argentinanyň Ykdysadyýet ministrligi häzirlikçe bu mesele boýunça teswir bermekden ýüz dönderdi.
Maksatnamanyň esasy maksady we artykmaçlyklary
Döwlet bergisini üzmek: Ýurduň ýolbaşçylary «altyn pasport» maksatnamasynyň kömegi bilen ýygnanjak serişdeleri Argentinanyň ýakyn ýyllarda tölemeli bolan on müňlerçe milliard dollarlyk döwlet bergisini ýapmak üçin ulanmagy göz öňünde tutýarlar.
Ägirtleriň arasyna girmek: Eger bu başlangyç resmi taýdan tassyklanylsa, Argentina maýa goýumyň üsti bilen raýatlyk hödürleýän dünýäniň iň uly döwletleriniň birine öwrüler.
Wizasyz syýahat mümkinçiligi: Argentin pasportynyň iň uly artykmaçlygy – onuň dünýäniň takmyndan 170 ýurduna wizasyz girmäge mümkinçilik bermegidir. Bu bolsa häzirki wagtda pula satyn alyp bolýan pasportlaryň arasyndaky iň ýokary görkezijidir.
