Türkmenistanly mekdep okuwçylary 7–10-njy oktýabrda Koreýa Respublikasynyň Inçhon şäherinde geçiriljek «FIRST Global Challenge 2026» atly halkara robot tehnologiýalary bäsleşigine gatnaşar.
«Robotlaryň Olimpiadasy» diýlip hem atlandyrylýan bu iri ýaryşa dünýäniň 190-dan gowrak döwletinden ýaşlaryň gatnaşmagyna garaşylýar.
Halkara bäsleşikde Türkmenistana Aşgabat şäheriniň dil dersleri çuňlaşdyryp öwredilýän ýöriteleşdirilen 97-nji orta mekdebiniň okuwçylary Nowbatow Suhan, Rejepow Oraznyýaz, Çolukow Aznawur, Babajyýew Arslan we Gurbanow Daýhan ýaly zehinli ýaşlardan düzülen «OguzRobot» topary wekilçilik eder.
Topar «Ýaş inžener 2026» bäsleşiginde tapawutlanan okuwçylardan saýlanyp alyndy. Bu ýigitler aprel aýyndan bäri «Kämil bilim» okuw merkeziniň «Erjeller» kompýuter bölüminde ýörite taýýarlyk gördüler. Olara Arkadag şäheriniň 1-nji ýöriteleşdirilen okuw-terbiýeçilik toplumynyň informatika mugallymy Myrat Sähetgulyýew we Türkmenistanyň Oguz han adyndaky Inžener-tehnologiýalar uniwersitetiniň talyby Dawut Gurbanow tälim berdi.
«FIRST Global Challenge» Olimpiýa oýunlarynyň nusgasynda guralýan robot tehnologiýalary boýunça halkara bäsleşikdir. Bu ýylky ýaryş tebigatda döreýän ýangynlaryň öňüni almak, olaryň täsirini azaltmak we ekologiýa durnuklylygyny üpjün etmek boýunça innowasion çözgütlere bagyşlanýar. Bäsleşigiň mowzugy «Igniting Innovation» diýlip atlandyrylýar.
Geçen ýyl türkmen mekdep okuwçylary Panamada geçirilen bu abraýly halkara bäsleşikde üstünlikli çykyş edip, «Skill Challenge» ugrundan birinji orna mynasyp bolupdylar.
