ABŞ-nyň Gymmatly kagyzlar we biržalar boýunça komissiýasy (SEC) we Ilon Mask 2022-nji ýylda Twitter-iň aksiýalarynyň satyn alynmagy baradaky iş boýunça ylalaşyga geldiler. Edara tarapyndan derňewiň başlanmagyna işewüriň gymmatly kagyzlary satyn alandygy baradaky maglumatlary öz wagtynda bermändigi sebäp boldy.
Derňew 2022-nji ýylyň maýynda başlandy. SEC-iň düzgünlerine görä, eger maýadar köpçülige açyk kompaniýanyň 5%-den gowrak aksiýasyny satyn alsa, ol on günüň dowamynda bu barada kadalaşdyryjy edara habar bermäge borçludyr. Mask 14-nji martda Twitter-iň 9,2% aksiýasyny satyn aldy, ýöne edara diňe 4-nji aprelde – bellenen möhletden on bir gün geçenden soň habar berdi.
Eýýäm 14-nji aprelde Ilon Mask tutuş kompaniýany 44 milliard dollara bahalandyryp, Twitter-i doly satyn aldy. Ilkinji paý baradaky maglumatlaryň giç çap edilmegi oňa takmynan 150 million dollar tygşytlamaga mümkinçilik berdi, sebäbi platformanyň aksiýalarynyň bahasy onuň birinji şertnamasyndan beýle bir ýokarlanmaga ýetişmedi.
Jemgyýetçilik jedelini çözmegiň çäginde Mask 1,5 million dollar möçberinde raýat jerimesini tölemäge razy boldy. Şol bir wagtda, telekeçi öz aýbyny boýun almaýar.
Işiň barşynda SEC işewüriň derňewi yza çekmek üçin dürli hileleri ulanyp, goýberilen çakylyklara yzygiderli äsgermezçilik edendigini-de görkezdi. Ilon Maskyň özi bolsa SEC-iň şol wagtky ýolbaşçysy Geri Gensleri ýazgaryp, kadalaşdyryjy edaranyň hereketlerini azar bermek hökmünde häsiýetlendirdi.
