Türkmenistanyň «Ahal» topary 2026/27 möwsüminiň AFK Çagyryş ligasynyň toparçalaýyn tapgyrynyň ilkinji duşuşygynda Butanyň «Paro» topary bilen 2:2 hasabynda deňme-deň oýnady. Türkmen topary iki gol tapawudy bilen öňde barýardy, ýöne 90-njy minutda aýgytlaýjy goly sypdyryp, garşydaşyna hasaby deňlemäge mümkinçilik berdi.
A toparçanyň çägindäki duşuşyklar Butanyň paýtagty Thimphudaky «Çanglimithang» stadionynda merkezleşdirilen tertipde geçirilýär.
«Ahal» hasaby 27-nji minutda açdy: Süleýman Mirzoýewiň geçiren topuny Aşyr Jumadurdyýew derwezä gönükdirdi. 38-nji minutda Ýakupmuhammet Gowşudow jerime meýdançasynyň daşyndan uran takyk we owadan urgusy bilen türkmen toparynyň artykmaçlygyny iki esse artdyrdy. Arakesmä toparlar 2:0 hasaby bilen çykdy.
Oýnuň ikinji ýarymynda «Paro» duşuşygyň gidişini öz peýdasyna üýtgetmegi başardy. 54-nji minutda Sidiki Jawara, takmynan, 23 metr aralykdan jerime urgusyny takyk ýerine ýetirip, tapawudy azaltdy. Myhmanlar hüjüm etmegi dowam etdirdi we duşuşygyň ahyrynda — 90-njy minutda Mustafa Jallou sag tarapdan Abduli Baldeniň geçiren topuny derwezä girizip, hasaby deňledi — 2:2.
Şeýlelikde, «Ahal» bilen «Paronyň» hersi A toparçada bir utuk toplady. Ýakynda Butanda ýedinji çempionlygyny gazanan «Paro» şowsuz geçen birinji ýarymdan soň ýeňlişden halas bolmagy başardy.
Toparçanyň beýleki oýnunda Liwanyň «Al-Ansar» topary Siriýanyň «Al-Ittihadyndan» 2:0 hasabynda üstün çykdy.
