Apple kompaniýasynyň baş direktory Jon Ternus «Siri» ses kömekçisiniň ösüşini çaltlandyrmagy we ony OpenAI hem-de Meta kompaniýalarynyň çözgütleri bilen bäsleşip biljek doly derejeli emeli aň agentine öwürmegi talap etdi. Bu barada Bloomberg neşiriniň žurnalisti Mark Gurman habar berdi.
Öňümizdäki aýlarda «Siri» Apple kompaniýasynyň programmalarynda has çylşyrymly işleri ýerine ýetirmek mümkinçiligine eýe bolmaly. Mysal üçin, ses kömekçisi «Photos» programmasynda suratlary redaktirläp, «Safari» brauzerindäki goýmalary dolandyryp biler. Bu funksiýanyň iOS 27.3 ulgamynda peýda bolmagyna garaşylýar.
Indiki tapgyrda «Siri» beýleki programmalar bilen baglanyşdyrylar. Gurmanyň maglumatyna görä, ýazda ses kömekçisi «Grubhub» arkaly nahar sargyt etmek ýa-da «OpenTable» arkaly restoranda stol bronlamak ýaly işleri ýerine ýetirip biler.
Geljekde Apple «Siri» kömekçisine yzygiderli gaýtalanýan işleri özbaşdak ýerine ýetirmegi öwretmegi maksat edinýär. Emeli aň kömekçisi ulanyjynyň öňünde goýan maksadyny yzarlap, indiki ädimleri kesgitläp we her bir hereketi el bilen işe girizmek zerurlygy bolmazdan, işlemegini dowam etdirip biler.
«Dots, Muse we Grok ulanyjynyň maksatlaryny yzarlap, indiki edmeli hereketleri kesgitläp we ondan her bir ädimi aýratyn işe girizmegi talap etmezden, bellenen netijä ýetmek üçin işlemegini dowam etdirip bilýär. Maňa mälim bolşuna görä, Apple hem şu ugurda öňe gitmek isleýär. Meniň pikirimçe, häzirki wagtda sarp edijileriň we bazaryň talaplaryny göz öňünde tutanyňda, kompaniýanyň başga üýtgeşik bir saýlawy hem ýok. Şonuň üçin geljek ýyl «Siri» has kämil agent görnüşine eýe bolup biler diýip pikir edýärin» diýip, Gurman gürrüň berýär.
