Buker baýragynyň guramaçylary 2026-njy ýylyň dalaşgärleriniň uzyn sanawyny (long-list) yglan etdi. Oňa ýedi ýurtdan bolan awtorlaryň 13 sany eseri girdi, olaryň köpüsi Beýik Britaniýa wekilçilik edýär.
Uzyn sanawa giren eserler:
- Hloýa Arijis — «Obýektiň kölegesi» (The Shadow of the Object)
- Emma Klaýn — «Switzy» (Switzy — iňlis dilinde Şweýsariýa berlen sähel ýaňsyly ýa-da mylakatly at, Switzerland sözünden gysgaltma)
- Makenna Gudman — «Hiç ýerli Ýelena» (Helen of Nowhere)
- M. Jon Harrison — «Hemme zadyň soňy» (The End of Everything)
- Marlon Jeýms — «Ýitenler» (The Disappearers)
- Lýuk Kennard — «Gara torba» (Black Bag)
- Kenan Orhan — «Dikeldiş» (The Renovation)
- Rebekka Perri — «Patyşany naharlandyr» (May We Feed the King)
- Gwendolin Raýli — «Palma jaýy» (The Palm House)
- Elizabet Straut — «Biziň hiç wagt aýtmaýan zatlarymyz» (The Things We Never Say)
- Duglas Stýuart — «Jonuň Jony» (John of John)
- Jamel Waýt — «Bary — it» (All Them Dogs)
- Missuri Williams — «Wiwisektorlar» (The Vivisectors)
Baýraga dalaşgärleriň arasynda geçen ýyllaryň iki sany ýeňijisi bar. Marlon Jeýms — 2015-nji ýylda «Ýedi ölümiň gysgaça taryhy» eseri üçin ýeňiji bolupdy, Duglas Stýuart bolsa 2020-nji ýylda özüniň «Şaggi Beýn» diýen ilkinji romany üçin bu baýraga mynasyp bolupdy.
81 ýaşly M. Jon Harrison ýeňiş gazanan halatynda baýragyň taryhynda iň uly ýaşly ýeňiji bolar.
Meşhur amerikan ýazyjysy Elizabet Straut üçin bu eýýäm Buker baýragyna üçünji gezek dalaşgärlikdir.
Bu ýylky uzyn sanawa ilkinji gezek eser ýazan üç awtor girdi — olar amerikaly Makenna Gudman, irlandiýaly Jamel Waýt we türk-amerikan kyssaçysy Kenan Orhandyr.
Emin agzalarynyň düzümine ýazyjy Raýmond Antrobus, sazanda Jarwis Koker, žurnalist Rebekka Lýu we ýazyjy Patrisiýa Lokwud girdi. Gysga sanaw 22-nji sentýabrda neşir ediler, ýeňiji bolsa 9-njy noýabrda yglan ediler.
Buker baýragy 1968-nji ýylda esaslandyryldy we ilkinji gezek 1969-njy ýylda gowşuryldy. 2014-nji ýyldan bäri eser iňlis dilinde ýazylan we Beýik Britaniýada çap edilen bolsa, islendik ýurduň awtorlary bu baýraga dalaş edip bilýär.
