Hytaýyň Pudu Robotics kompaniýasy tutuşlygyna robotlar tarapyndan dolandyryljak we adam zähmetini talap etmejek täze bir myhmanhananyň gurluşygyny yglan etdi. Bu desganyň resmi taýdan açylmagy 2027-nji ýyla meýilleşdirilýär.
Myhmanhana Günbatar emeli adasynda ýerleşer. Onuň içinde 44 sany ýokary hilli otag, restoran, sport zaly we myhmanlar üçin niýetlenen beýleki otaglar bolar. Ähli hyzmatlar bir bitewi akylly ulgama birleşdiriler. Bu ulgam myhmanlaryň hasaba durmagyndan başlap, otaglaryň arassalygyna çenli ähli işleri üpjün eder.
Myhmanhanany «PuduFM 1.0» programma platformasy we «PuduAgent» emeli aň agenti dolandyrar. Awtomatlaşdyrylan söwda ulgamyndan sargytlary daşamak işine «FlashBot» roboty jogap berer, «PUDU T300» roboty ýükleri daşar, «PUDU CC1 Pro» we «PUDU MT1» robotlary bolsa hapa-galyndylary tanamak tehnologiyasy arkaly otaglary arassalamak bilen meşgullanar.
Pudu Robotics kompaniýasynyň mälim etmegine görä, ähli robotlar bitewi akylly ulgam esasynda bilelikde işleşerler. Kompaniýanyň maglumatlaryna görä, şeýle ulgam robotlara öz hereketlerini utgaşdyrmaga, ýollary özbaşdak saýlamaga, üýtgeýän şertlere uýgunlaşmaga we adamyň ýardamy bolmazdan dürli wezipeleri ýerine ýetirmäge mümkinçilik berer.
Taslama tapgyrlaýyn amala aşyrylar. 2026-njy ýylyň ahyrynda geljek ýolagçylar üçin ilkinji birnäçe otaglar we robotlaşdyrylan hyzmatlaryň bir bölegi synag hökmünde açylar.
Bu myhmanhana Günbatar emeli adasyny ösdürmek taslamalarynyň biri bolar. Bu adada ýakyn dört ýylyň dowamynda syýahatçylyk we hyzmatlar pudagynda robot tehnologiýalarynyň ulanylyşyny has-da giňeltmek meýilleşdirilýär.
