Ýaponiýanyň parlamenti Tokio täsir eden uly ýertitreme, tebigy betbagtçylyk ýa-da başga bir adatdan daşary ýagdaý ýüze çykan halatynda merkezi häkimiýet edaralarynyň işini başga bir şähere geçirmäge mümkinçilik berjek ätiýaçlykdaky paýtagty döretmek baradaky kanuny makullady. Bu barada «Kyodo» agentligi habar berýär.
Kanun taslamasy Liberal-demokratik partiýanyň ýolbaşçylygyndaky dolandyryjy koalisiýa tarapyndan hödürlendi.
Resminama laýyklykda, premýer-ministr ilat sany we ykdysady ösüş derejesi boýunça bellenen talaplara laýyk gelýän prefekturalaryň arasyndan ätiýaçlykdaky paýtagty saýlap biler. Çözgüt sebitleriň haýyşnamalarynyň esasynda kabul ediler.
Bu statusa iň esasy dalaşgär Osaka hasaplanýar, ýöne bu taslama Nagoýa, Fukuoka we Sapporo şäherleri hem gyzyklanma bildirdi. Ýeňiji bolan prefektura Tokionyň 23 ýörite raýonyna meňzeşlikde ýörite administratiw raýonlary döretmeli bolar.
Bu başlangyç geçen ýylyň oktýabr aýynda Liberal-demokratik partiýa bilen Ýaponiýanyň Galkynyş partiýasynyň (JIP) arasynda baglaşylan ylalaşygyň bir bölegi boldy. Kanuny goldaýanlar giň möçberli adatdan daşary ýagdaý ýüze çykan halatynda täze ulgam döwlet edaralarynyň bökdençsiz işlemegini üpjün eder diýip hasaplaýar.
Kanuny tankytlaýanlar hem bar. Esasy oppozision Konstitusion-demokratik partiýa we beýleki fraksiýalar kanunyň JIP-iň bähbitlerine görä düzülendigini aýdýar, sebäbi Osaka onuň syýasy binýady bolup durýar.
Kanun taslamasynyň maslahatlaşylmagy tas iki hepde dowam etdi. Jedelli meseleleriň biri ýerli saýlawlary we referendumlary bir günde geçirmegi gadagan etmek baradaky teklip boldy. Üýtgeşmeler girizilenden soň oppozisiýa resminamany jemleýji ses berişlige çykarmaga razy boldy.
Şol gün parlamentiň ýokary palatasy Konstitusiýa düzedişler girizmek barada referendumlary geçirmegiň tertibini kämilleşdirmek baradaky kanun taslamasyny hem makullady we öz resmi adyny Senat diýip üýtgetmek barada çözgüt kabul etdi.
