Dubaýda şäher häkimi Muhammed bin Raşid Al Maktumyň kiçi dogany şeýh Ahmed bin Raşid Al Maktumyň 76 ýaşynda aradan çykmagy sebäpli on günlük resmi matam yglan edildi. Bu hakda Euronews habar berýär.
Matam 21-nji sentýabrdan 1-nji oktýabra çenli dowam eder. Bu döwürde döwlet baýdaklary ýygnalar. Ahmed bin Raşid Dubaýyň polisiýa we jemgyýetçilik howpsuzlygynyň başlygynyň orunbasary wezipesini eýeleýärdi. Ol, şeýle-de ARM Holding maýa goýum toparynyň ýolbaşçysydy we 1991-nji ýylda Dubai Real Estate Centre-i esaslandyrypdy.
Şeýh ömrüniň agramly bölegini sporta bagyşlady. Ol «Al-Wasl» futbol klubuna ýolbaşçylyk etdi, Dubai International Marine Club-uň döredilmegine we motorly gaýyklaryň ýaryşlarynyň ösdürilmegine gatnaşdy.
1990-njy ýyllaryň başynda Ahmed bin Raşid Jebel Ali at çapyşyklarynyň geçirilýän meýdançasyny – uly aýlawy esaslandyrdy we Dubai Racing Club-uň döredilmegine gatnaşdy. Bu taslamalar BAE-de at sportunyň ösmegine ýardam etdi.
Ýatladyp geçsek, Türkmenistanyň Prezidenti Serdar Berdimuhamedow BAE-niň wise-prezidenti, premýer-ministri we Dubaýyň häkimi Şeýh Mohammed bin Raşid Al Maktuma gynanç hatyny ýollady.
