DreamWorks Animation studiýasynyň «Unutma adasy» (Forgotten Island) atly täze multfilmi Rotten Tomatoes saýtynda tankytçylaryň 34 synynyň esasynda 100% netije gazanmagy başardy.
Režissýorlar Joýel Kroufordyň we Hanuel Merkadonyň bu işi barada diňe oňyn pikirler aýdylýar. Seslenmelerde eseriň aýdyň animasiýasy we täsirli edebi esasy aýratyn bellenilýär.
Wakalar 1990-njy ýyllarda Filippinlerde bolup geçýär. Dostlar Jo we Raissa tötänden jadyly portal arkaly Nakali atly mifiki ada düşýär. Olar öýlerine dolanmak üçin geň-taň jandarlar bilen gabatlaşmaly we dostluk baradaky ýatlamalaryndan el çekmäge taýýardyklaryny ýa däldigini çözmeli bolýar.
Tankytçylar multfilmiň wizual tarapyna we emosional çuňlugyna ýokary baha berdi.
«Bu, şeksiz DreamWorks Animation-iň iň gowy multfilmleriniň biri hem-de soňky bäş ýylyň içinde «Ädikli pişik— 2: Soňky arzuw» we «Ýabany robot» filmlerinden soňky üçünji ajaýyp animasiýasydyr» diýip, The Outside Scoop neşirinden Skott Mendelson belleýär.
The Sydney Morning Herald neşirinden Karl Kuinn bolsa şeýle ýazýar:
«Ol haýran galdyryjy. Emma täsirli wizual tarapyna garamazdan, multfilm aňly-başly ýazylan sýužeti, çynlakaý duýgulary we öz ündeýän medeniýetine bolan söýgüsi bilen ýadyňda galýar».
The Hollywood Reporter neşirinden Frenk Şek hem eseriň depginini öwdi. Ol animede «Möý-adam: Älemiň jümmüşinden» filminiň täsiriniň duýulýandygyna ünsi çekdi:
«Çylşyrymly wakalar degişme, henek, energiýa we wizual döredijilik bilen şeýle bir beýan edilýär welin, ekranda bolup geçýän hyýaly wakalara nädip berleniňi hem duýman galýarsyň. Iki gyzyň arasyndaky täsirli gatnaşyklar we olaryň enaýyja Lola bilen baglanyşygy tomaşaçyny çyndan tolgundyrýar».
«Unutma adasy» multfilminiň ABŞ-daky premýerasy 25-nji sentýabrda geçiriler.
