Alehandro Gonsales Inýarritunyň režissýorlygyndaky Tom Kruzuň baş keşbi ýerine ýetirýän «Digger» atly täze satiriki komediýasy kassa ýygymynda garaşylýan netijäni berip bilmedi. Film ilkinji dynç günlerinde dünýä boýunça, takmynan, $20 million gazandy. Şol girdejiniň $8 milliony ABŞ-nyň kassa ýygymyna, ýene $12 milliony bolsa 74 ýurda düşdi. Bu Tom Kruzuň karýerasyndaky iň şowsuz başlangyçlaryň biri boldy.
Aktýoryň ABŞ-nyň kassa ýygymyndaky iň şowsuz çykyşy häzire çenli 2007-nji ýylda surata düşürilen «Guzular üçin ýolbarslar» filmi bolup galýar. Ol film ilkinji dynç gününde bary-ýogy $6,7 million gazanypdy.
Täze filmiň önümçilik býujeti, takmynan, $150 million diýlip çaklanylýar. Şeýle-de marketing üçin ýene $100 million töweregi serişde sarp edilen bolmagy ahmal.
Film tomaşaçylardan hem känbir oňyn baha alyp bilmedi. CinemaScore oňa C+ derejesini berdi. Bu Kruzuň soňky on ýylda alan iň pes görkezijisidir. Deňeşdirip aýtsak, «Missiýa ýerine ýetirmesiz: Soňky haklaşyk» filmi A-, «Top Gan: Mewerik» A+, 2017-nji ýyldaky «Mumiýa» filmi bolsa B- derejesini aldy.
Rotten Tomatoes saýtynda bu film barada tankytçylaryň 51 göterimi, tomaşaçylaryň bolsa 72 göterimi oňyn pikir bildiripdir.
Filmiň wakalarynda Tom Kruz Grenlandiýadaky ýatakda metanyň köpelýändigi baradaky duýduryşlara ähmiýet bermeýän nebit magnaty Digger Rokwelliň keşbini janlandyrýar. Netijede, buraw desgasynda partlama bolup, ägirt uly buz şelfi bölünip gaýdýar we Ýewropa tarap hereket edip başlaýar. Bu bolsa tutuş dünýäni howp astyna salýar. Digger adamlary halas etmek bilen bir wagtda, öz işini we abraýyny hem goramaga jan edýär.
Filmiň şowsuzlygynyň bir sebäbi tomaşaçylaryň Tom Kruzy, köplenç, boýewik filmlerindäki gaýratly gahrymanyň keşbinde görmäge öwrenişendigi bilen baglanyşyklydyr. «Digger» filminde bolsa aktýor düýbünden başga — ekologik betbagtçylygyň merkezinde galan, özüne aşa göwni ýetýän milliarderiň keşbini döretdi.
Filmiň şowsuzlyga uçrandygyna garamazdan, Tom Kruz bu işine buýsanýandygyny aýdýar. Aktýor sosial ulgamlarda filmiň üstünde zehinli kärdeşleri bilen bilelikde işlemekden söýünendigini we olaryň zähmetiniň netijesine guwanýandygyny ýazdy.
«Digger» Inýarritunyň 2022-nji ýylda çykan «Barda, birnäçe hakykatyň ýasama ýyl ýazgysy» filminden soňky birnäçe ýylyň dowamynda surata düşüren ilkinji doly göwrümli filmi boldy. Režissýor «Diri galan», «Bördmen» we «Wawilon» ýaly filmleri bilen tanalýar.
