Eýranyň ýol we şäher ösüşi ministri Farzane Sadeg Malwajerd ýurduň durmuş-ykdysady ösüşinde zenanlaryň eýeleýän orny barada gürrüň berdi. Bu barada THP habar berýär.
«Awaza» milli syýahatçylyk zolagynda geçirilen Halkara zenanlar dialogynyň mejlisinde çykyş edip, ol taryhyň dowamynda eýran zenanlarynyň agyr döwürlerde çydamlylyk hem-de batyrgaýlyk görkezip, jemgyýetde döredijilikli orny eýeländigini belledi. Ministr olaryň çökgünlikleriň netijelerini ýok etmekde we infrastrukturany täzeden dikeltmekde hem-de ylym, medeniýet, sport we telekeçilik ulgamlaryny ösdürmekde goşýan goşantlaryny nygtady.
Onuň aýtmagyna görä, forumyň Türkmenistanda geçirilmegi zenanlaryň hukuklaryny hem-de mümkinçiliklerini giňeltmek meselelerinde tejribe alyşmak we hyzmatdaşlygy berkitmek üçin möhüm meýdança döredýär.
Eýranyň döwlet syýasaty barada aýtmak bilen, Farzane Sadeg ösüş maksatnamalarynyň maşgala edarasyny berkitmäge, aýal-gyzlaryň hünär taýdan ösmegine böwet bolýan päsgelçilikleri aradan aýyrmaga, olaryň hukuklaryny goramaga we durmuş adalatlylygyny üpjün etmäge gönükdirilendigini belledi.
