Hindistanyň Deli şäheriniň hökümeti benzin bilen işleýän skuterleri, motosiklleri we awtorikşalary (üç tigirli ulag serişdesi) kem-kemden gadagan etmek meýilnamasyny yglan etdi. Häkimiýetler bu çäre arkaly howanyň hapalanmagyna garşy göreşmegi maksat edinýär diýip, «The Guardian» neşiri ýazýar.
Esasan benzin we gysylan gazylyp alynýan gaz (metan) bilen işleýän skuterler hem-de rikşalar Deliniň ýollaryndaky on müňlerçe ulag serişdeleriniň üçden ikisinden gowragyny düzýär. Olar şäherdäki howanyň hapalanmagynyň esasy çeşmeleriniň biri bolup, her ýyl on müňlerçe ýaşaýjynyň janyna howp salýar.
2027-nji ýylyň 1-nji ýanwaryndan başlap, Delide diňe kiçi göwrümli elektrik ýük ulaglary we üç tigirli ulaglar üçin döwlet belgileri berler. 2028-nji ýylyň apreline çenli bolsa bu düzgün elektrik skuterlerine we elektrik motosikllerine hem degişli ediler.
Deliniň hökümeti bu täze düzgüniň kömegi bilen 2030-njy ýyla çenli şäherdäki ulag parkynyň azyndan 30%-iniň elektrik görnüşli bolmagyna umyt bildirýär. «Iki we üç tigirli ulaglary tapgyrlaýyn ulanylyşdan aýyrmak baradaky hödürlenen meýilnama Deliniň howanyň hapalanmagyna garşy göreşinde ýagdaýy düýpli üýtgedip biler» – diýip, Ekologik taýdan arassa ulaglar boýunça halkara geňeşiň direktory Amit Bhatt belledi.
