Awgustyň ahyrynda Nissan kompaniýasy Ýaponiýada Note hetçbek maşgala awtoulaglarynyň täzelenen tapgyryny satyp başlady. Bu tapgyryň iň esasy täzeligi — adaty modeller üçin niýetlenen ýörite Black Edition hem-de Nismo sport görnüşi üçin flagman Black Limited modifikasiýasy boldy.
Ulagyň adyndaky «gara» sözi awtomobiliň daşky reňkine däl-de, diňe gara bezeg elementlerinden ybarat «anti-hrom» bukjasyna degişlidir. Şonuň üçin bu modifikasiýalar sargyt edilende kuzowyň reňkini dürli öwüşginlerde (mysal üçin, ak merjen, gök, kümüşsöw) ýa-da tapawutly iki reňkde saýlap bolýar.
Note Aura Black Edition has premium görnüş hökmünde öňe sürülýär. Onuň daş keşbem, standart enjamlaşdyrylyşam has üýtgeşik. Şonuň üçin bahasy-da adaty Aura bilen deňeşdirilende 14,8% gymmat.
Esasy aýratynlyklary:
- Daşky görnüşi: Radiator gözenegi, gapdal aýnalaryň korpuslary, nyşanlar we ýazgylar ýalpyldawuk gara reňk bilen örtülen. Öňdäki faralar birneme garaldylan, tigirlere bolsa ýörite gara reňkli alýumin diskleri oturdyldy.
- Içki bezegi: Salonda gara we goýy çal reňkler agdyklyk edýär. Rul adaty deriniň ýerine täze ekologiýa taýdan arassa sintetiki TailorFit materialy bilen örtüldi.
- Enjamlaşdyrylyşy: Bu görnüşiň standart toplumyna eýýäm ProPilot ýarym awtonom sürüş ulgamy, NissanConnect multimediýa-nawigasiýa ulgamy we öňdäki oturgyçlaryň kelle daýançlaryna dinamik ýerleşdirilen Bose Personal Plus akustik ulgamy girýär. Mundan başga-da, eýýäm zawod çykanynda oturgyçlary we ruly gyzdyrma funksiýasy bilen çykarylýar.
Tehniki aýratynlyklary
Motor gurluşynda üýtgeşme ýok. Ulag 1,2 litrlik üç silindrli benzin hereketlendirijisine (81 at güýji) esaslanýan ikinji nesil e-Power yzygiderli gibrid ulgamy bilen enjamlaşdyrylan. Benzin hereketlendirijisi diňe batareýa zarýad bermek üçin generator hökmünde işleýär. Tigirleri diňe elektromotor herekete getirýär.
- 2WD (öňki ýöredijili): Öňki elektrik hereketlendirijisiniň kuwwaty 134 at güýjüne deň.
- 4WD (doly ýöredijili): Yzky goşmaça elektrik hereketlendirijisi ýene 67 at güýji goşýar.
Ýaponiýanyň içerki bazarynda Note Aura Black Edition görnüşiniň bahasy motoryna baglylykda 3 271 400–3 610 200 ýena aralyk bahadan satylýar (takmynan 20 500–22 600 dollar).
Note Aura Nismo Black Limited sport görnüşi bolsa gyzyl bezeg elementleri bolmazdan, diňe ýalpyldawuk gara bezegde hödürlenýär. Ony 4 011 700 ýena (takmynan 25 200 dollar) sargap bolýar.
