Estoniýanyň adalat kansleri Ýulle Madize ýurduň prezidentligine saýlandy. Parlamentiň (Riýgikogu) 2-nji sentýabrdaky mejlisinde geçirilen gizlin ses berlişiginde ol 101 sesden 71-sini aldy diýip, Estoniýanyň ERR teleradioýaýlymy habar berdi.
Prezident saýlanmak üçin, dalaşgär sesleriň azyndan 68-sini — parlamentiň düzüminiň üçden iki bölegini almalydyr. Bu saýlawda ýedi deputat ses bermekden saklandy, ýene 12-si bolsa mejlise gatnaşmady.
Netijeler yglan edilenden soň, Madize goldaw beren deputatlara sagbolsun aýtdy.
«Bu ynamy ödemek üçin elimde baryny ederin» diýip, ol jebislik bilen bitirilen işiň Estoniýada durmuşy «bagtly, bolçulykly hem-de howpsuz» etmäge mümkinçilik berjekdigine umyt bildirdi.
51 ýaşly Ýulle Madize hünäri boýunça hukukçydyr. Ol ozal Adalat ministrliginde, Parlamentiň Konstitusion toparynda, Döwlet gözegçilik gullugynda işledi, 2009-njy ýyldan 2015-nji ýyla çenli bolsa prezident Toomas Hendrik Ilwesiň hukuk geňeşçisi boldy. 2015-nji ýyldan bäri adalat kansleri wezipesini eýeledi, 2021-nji ýylyň başynda bolsa şol wezipesine ikilenç saýlanyldy.
Madize Estoniýanyň ýedinji prezidenti we bu wezipä eýe bolan ikinji zenan maşgala bolar. Ol parlamentde kasam kabul edenden soň, 12-nji oktýabrda wezipä girişer.
Döwlet baştutany wezipesinde Madize bu wezipäni bir möhlet eýelän we iýun aýynda gaýtadan dalaşgärlik etmejekdigini yglan eden Alar Karisiň ornuna geçer. Karis saýlanan prezidenti gutlap, oňa «güyç-kuwwat, paýhas hem-de edermenlik» arzuw etdi.
Ozal Alar Karis prezidentlik möhleti gutarandan soň, beýlä süýşüren birgiden işleri, aýratyn-da, hojalyk meseleleri bilen meşgullanmak isleýändigini aýdypdy. Täze prezidente ygtyýarlyklary geçirmezden öň ol ýene birnäçe daşary ýurt saparlaryny, şol sanda Ýewropa ýurtlaryna we ABŞ-a saparlary amala aşyrmaly bolar.
