Madridiň «Realy» Ispaniýanyň çempionatynda «Barselonany» 2:1 hasabynda ýeňdi. Duşuşyk Barselonadaky «Kamp Nou» stadionynda geçirildi.
Hasap arakesmäniň öňüsyrasynda açyldy. 41-nji minutda jerime meýdançasyna geçirilen topy katalonlaryň goragçysy Žerar Martin daşlaşdyrmaga synanyşdy, ýöne top hüjüme goşulan Kilian Mbappe degip, ondanam derwezä tarap gönükdi.
Birinji ýarymda «Barselonanyň» düzüminde mejbury çalşyk boldy. Goragçy Hawi Espart şikes alyp, 30-njy minutda meýdançany terk etdi. Onuň ýerine Alehandro Balde oýna girdi.
Ikinji ýarymyň ortalarynda ýer eýeleri hasaby deňlemegi başardylar. 61-nji minutda Pedriniň pasyndan soň Rafinýa tapawutlandy. Emma duşuşygyň ahyrynda, 87-nji minutda «Real» tiz hüjüm gurnap, ýene öňe saýlandy – Eduardо Kamawinganyň geçiren topuny Kilian Mbappe derwezä depip, dubl etdi.
Duşuşykdan öň bukmeýkerler «Barselonany» faworit hasaplapdylar.
Bu kataloniýaly klubuň şu möwsümde La Ligadaky ilkinji ýeňlişi, «Realyň» bolsa 2023-nji ýylyň oktýabryndan bäri katalonlaryň meýdançasynda gazanan ilkinji myhmançylyk ýeňşidir.
Žoze Mourinýonyň tälim berýän topary 24 utuk bilen ýaryş jedwelinde üçünji orny eýeleýär. «Barselona» bolsa 27 utuk bilen birinji orunda barýar.
